Azərbaycanda ofis mebellərinin istehsalı və təkmilləşdirilməsi istiqamətində texnoloji həll yolları təqdim edən Qardaşlar mebel şirkəti fürsətlər ölkəsinə mebel ixrac etməklə bağlı işlərini tamamlayıb.

Şirkətin rəhbəri Əli Mirzəyev Amerika bazarına mebel ixrac etməyə tam hazır olduqlarını açıqladı.

“Amerika bazarı bizim üçün hər zaman cəlbedici olub. Biz bu istiqamət üzrə görülməsi nəzərdə tutulan bütün işləri tamamlamışıq. Hal-hazırda ixrac prosesinin başlanması üçün beynəlxalq yük daşımaları sektorundakı ölkələrarası müəyyən məhdudiyyətlərin aradan qaldırılmasını gözləyirik. Dünyada baş verən pandemiya digər sahələrdə olduğu kimi mebel sahəsində də yeni istiqamətlər formalaşdırdı. Bu istiqamətlərin bizim Amerika bazarına daxil olmamışdan öncə baş verməsi bizim həmin ölkəyə ixracla bağlı növbəti addımlarımızı öncədən müəyyən etməyə imkan yaratmış oldu. Düşünürəm ki, həmin ölkələrdə yeni müştəri davranışlarının formalaşması, bir çox şirkətlərin öz əməkdaşlarına uzun müddət evdən işləməsinə icazə verməsi yeni və praktik ofis mebellərinin yaranmasına təkan verəcək. Biz Amerika şirkətlərinin pandemiya ilə bağlı verdikləri qərarları yaxından izləyir və bu qərarların mebel sektoruna ola biləcək təsirlərini təhlil edirik.”

Şirkət rəhbəri Amerika bazarına ixrac edəcəkləri mebelin ölkə iqtisadiyyatı üçün də böyük faydası olacağını vurğulayıb.

“Amerikaya göndərdiyimiz nümunə mebellərlə bağlı müsbət rəyin formalaşması həmin bazarda mövqeyimizi möhkəmləndirməyə imkan yaradır. Əgər satışlarımız planlaşdırdığımız kimi gedərsə, biz əlavə iş yerlərinin açılmasını və istehsal sahəmizi daha da genişləndirməyi nəzərdə tuturuq. Amerika bazarında satışlarımızın artan templə davam etməsi, həmçinin ölkə iqtisadiyyatına xarici valyuta axınını da təmin edəcəkdir.”

Qeyd edək ki, Qardaşlar mebel yerli bazarda krizis kommunikasiya planını əvvəlcədən və doğru şəkildə quran şirkətlərdən biridir. Şirkətin marketinq və biznesin inkişafı departamentinin apardığı yerli və xarici bazar təhlilləri şirkət üçün yeni istiqamətlər formalaşdırmağa dəstək olmaqdadır.