İran İnqilab Keşikçiləri Ordusu, ABŞ-ın İraqdakı "Ayn el-Esad" hava bazasını onlarla raket ilə vurduğunu açıqladı. Pentaqondan verilən açıqlamada "el-Esad" və "Erbil" bazalarına 12-dən çox balistik raket ilə hücum təşkil edildiyi bildirilib. ABŞ bazalarına təşkil edilən hücumda ölü ya da yaralı sayı haqqında hələ məlumat yoxdur.

İran İnqilab Keşikçiləri Ordusu İraqın Anbar vilayətində yerləşən və ABŞ əsgərlərinin olduğu "Ayn el-Esad" hava bazasına balistik raket ilə hücum təşkil edib.

İran dövlət televiziyası "General Qasım Süleymaninin və yoldaşlarının intiqamı üçün ilk cavab reallaşdırıldı" məlumatını yayıb.

"Marja" xəbər verir ki, "Sky News" kanalına danışan bir mənbə, hücumda 10-dan çox raketin istifadə edildiyi məlumatını verib. 

Hücumun İran torpaqlarından deyil, İraq sərhədləri daxilindən edildiyi də bildirilir.  "Al Arabiya" kanalı, hücumun İraq "Hizbullah"ı tərəfindən reallaşdırıldığını iddia edib.

Pentaqon səlahiyyətlisi etdiyi açıqlamada "Ayn el-Esad" bazasına raket ilə hücum təşkil edildiyini, ölü və yaralılara bağlı hələ məlumatlarının olmadığını söyləyib.

ABŞ Müdafiə Nazirliyi (Pentaqon), İranın ABŞ əsgərlərinin olduğu İraqdakı "el-Esad" və "Erbil" bazalarına 12-dən çox balistik raket ilə hücum təşkil etdiyini və ilk ziyanları müəyyənləşdirilməyə çalışıldığını açıqlayıb. 

Pentaqonun spikeri Jonathan Hoffman etdiyi yazılı açıqlamada, "7 Yanvarda İran, İraqdakı ABŞ və koalisiya qüvvələrinə raketlər ilə hücum təşkil etdi. Bu raketlərin İrandan atıldığı və ABŞ və koalisiya əsgərlərinin olduğu "el Esad" bazası ilə "Erbil"  bazalarının hədəf aldığı açıqdır. İlk ziyanları qiymətləndirməyə çalışırıq" ifadələrini istifadə edib.

Hoffman, İranın ola biləcək hücumlarına qarşı Pentaqonun bütün tədbirləri gördüyünü qeyd edib. 

AĞ EV: TRUMP YAXINDAN İZLƏYİR

Ağ Evin Spikeri Stephanie Grisham, İraqdakı ABŞ bazalarına hücum mövzusunda Prezident Donald Trampın məlumatlandırıldığını və vəziyyətin yaxından izlənildiyini açıqlayıb.

Grisham,  "İraqdakı ABŞ hərbi bazalarına hücum ilə əlaqədar Prezident məlumatlandırılıb, vəziyyəti yaxından izləyir və milli təhlükəsizlik qrupu ilə təmas halındadır" ifadələrini istifadə edib. 

İran İnqilab Keşikçiləri Ordusu, İraqdakı "Ayn el-Esad" Hava Bazasına balistik raketlər ilə reallaşdırılan hücuma ABŞ-ın cavab verməsi halında, "çox daha sərt və əzici" cavab veriləcəyini açıqlayıb.

İran İnqilab Keşikçiləri Ordusu tərəfindən yayılan açıqlamada, İranlı general Qasım Süleymaninin intiqam əməliyyatı daxilində, ABŞ-ın İraqdakı "Ayn el-Esad" Hava Bazasının onlarla qurudan quruya balistik raketlə vurulduğu qeyd edilib. 

Bölgədə ABŞ bazalarına ev sahibliyi edən ölkələrin də xəbərdar edildiyi açıqlamada, "Hər vəziyyətdə İrana qarşı düşməncə və təcavüzkarca hərəkətlərin qaynağı hədəf alınacaq. İşlədikləri cinayətdə sionist rejimi (İsrayıl) də günahkardır və ABŞ rejimindən ayrı tutmuruq" ifadələri istifadə edilib.

Açıqlamada, ABŞ xalqına isə bölgədəki əsgərlərini daha çox zərər görməmələri üçün ölkələrinə çağırmaları tövsiyə edilib.