ABŞ Prezidenti Donald Tramp, İraq Parlamentinin ABŞ əsgərlərinin ölkədən çıxmasını tələb edən qərarına reaksiya verərək, "(İraq) Ölkədən çıxmamızı istəyərlərsə və bunu dostca etməzlərsə onlara daha əvvəl heç görmədikləri ağır sanksiyalar tətbiq edərik. İran sanksiyaları bunların yanında yüngül qalar" deyib.

ABŞ Prezidenti Donald Tramp, Floridadan dönüşündə təyyarədə jurnalistlərin suallarını cavablandırıb.

"Marja" xəbər verir ki, ABŞ-ın ən başda İraqa girməsinə qarşı çıxdığını deyən Tramp, İraqa girmənin böyük səhv olduğunu və İraqın 11 Sentyabr hücumları ilə əlaqəli olmadığının isbat edildiyini vurğulayıb.

İraq ilə bərabər bir çox bölgədən çıxmağa çalışdıqlarını qeyd edən Tramp, "Suriyadan çəkildim çünki o sərhədi (Türkiyə-Suriya) qorumayacağam. Niyə o sərhədi mən qoruyum? Əsgərləri var qorusunlar. O sərhəddəki qarşıdurma min ildir davam edir. Oraya indi etibarlı bölgə deyirik, amma əslində etibarlı bölgənin əksi var orada. Orada çox insan öldü. Türkiyədən çox insan öldü" deyib.

ABŞ-ın İraqdan çıxmasına dair sualları cavablandıran Tramp, "Orada nəhəng ölçüdə bahalı bir baza tikmişik. Milyardlarla dollara başa gəlib. Məndən çox əvvəl tikilib. Xərclərimiz üçün geri ödəmə etmədikləri müddətcə İraqdan çıxmayacağıq", - ifadəsini istifadə edib.

İraq rəhbərliyini təhdid edən Tramp, "(İraq) Ölkədən çıxmamızı istəyərlərsə və bunu dostca etməzlərsə onlara daha əvvəl heç görmədikləri ağır sanksiyaları tətbiq edərik. İran sanksiyaları bunların yanında yüngül qalar" deyib. 

Dünən Tramp İrana aid bəzi mədəni abidələrin də olduğu 52 hədəfi seçdiklərini açıqlamışdı. Bununla bağlı suala Tramp, "Onların insanımızı öldürmələrinə icazə var, insanımıza işgəncə etmələrinə və şikəst etmələrinə icazə var, yol kənarlarına bomba yerləşdirib insanımızı öldürmələrinə icazə var, bizim onların mədəni sahələrinə toxunmamağımıza icazə yoxdur. Bu belə olmaz" cavabını verib.

Tramp, İran İnqilab Mühafizəçiləri Qvardiyasının "Qüds Gücü" Komandiri Qasım Süleymaninın öldürülməsinə İranın cavab verməsi vəziyyətində ABŞ-ın buna cavabının çox böyük olacağını açıqlayıb.

Tramp, Süleymani haqqında da, "Xüsusilə də son 18 ayda ölkəsini çox təhlükəli bir yola sürümüşdü" şərhini edib.

İraq parlamentində dünən keçirilmiş fövqəladə iclasda, ABŞ-ın və digər xarici güclərin ölkədən çıxarılmasına qərar verilib.

ABŞ Müdafiə Nazirliyi (Pentaqon), İranlı general Qasım Süleymaninin Bağdad hava limanı yaxınlığında öldürüldüyünü açıqlamışdı. Qasım Süleymaninin öldürülməsi üçün təşkil edilmiş hava hücumunda 5 iraqlı daxil 10 nəfər də ölüb.