“2016-2017-ci illər ərzində bankların verdiyi kreditlərdə ödəmə vaxtı keçmiş kreditlərin xüsusi çəkisi 3%-dən aşağıdır. Bu, pozitiv siqnaldır”.

“Marja”nın məlumatına görə, bunu 2-ci Bankçılıq Forumunda Azərbaycan Respublikasının Maliyyə Bazarlarına Nəzarət Palatasının baş icraçı direktoru İbrahim Alışov bildirib.

“Deməli banklarımız kredit siyasətlərinə yenidən baxırlar və sevindirici haldır ki, banklar öz risklərini idarə etməyi özlərinə təşviq edirlər”,- o deyib.

“ƏMANƏTLƏRİN SEKTORDAN QAÇIŞI SƏNGİYİB”

İbrahim Alışov bildirib ki, bank sektorunda görülmüş sərt tədbirlər nəticəsində sektorda qeyri-işlək aktivlərin artım dinamikası və əmanətlərin geri götürülməsi prosesi səngiyib:

"Əmanətlərin sektordan qaçışı 2016-cı ilin 10 ayında 22% olduğu halda, 2017-ci ilin müvafiq dövründə 2,4% olmuşdur. Bu da, əsasən 2017-ci ilin birinci rübünə təsadüf etmişdir. Son 7 ayda əmanətlərin həcmində 5,2% və ya 362 milyon manat artım müşahidə edilib. Oktyabr ayının sonuna olan məlumata görə, banklarda əhalinin əmanətləri 7,3 milyard manata çatmışdır.

Digər pozitiv trendlərdən biri, banklar xərclərin optimallaşdırılmasını özlərinə prioritet elan etmələrinə baxmayaraq 3-cü rübdə bank əməkdaşlarının sayının 245 nəfər artmasıdır. Bu, iki devalvasiya şokundan sonra sektorda ilk pozitiv trenddir.

Pozitiv trendlərdən biri budur ki, artıq biz kreditləşmədə müsbət inkişafa nail olmuşuq. Düzdür bu, təxminən informasiya və rabitə sahəsinə verilən kreditlərin 27% və kənd təsərrüfatı sahəsinə verilən kreditlərin 12% artması ilə özünü göstərib. Mütləq ifadədə kreditləşmədə artım Sentyabr ayında 62 milyon manat olmuşdur”.

“BEYNƏLXALQ BANKIN DOMİNAT PAYI AŞAĞI SALINIB”

İcraçı direktor bildirib ki, bu ilin 9 ayında Beynəlxalq Bankın sağlamlaşdırılması yekun fazasına keçmişdir: “Bu il ərzində təxminən 4,3 milyard manat həcmində toksit aktivlər Beynəlxalq Bankın balansından “Aqrarkredit”ə ötürülüb. Nəticədə sistem əhmiyyətli bank olan Beynəlxalq Bankın sektorda dominat payı aşağı salınıb. Məlumat üçün bildirim ki, bu proseslərdən sonra Beynəlxalq Bankın sektordakı payı 41%-dən 27%-ə düşmüşdür. Mütləq ifadədə bu, təxminən 13 milyard manatdan 7 milyard manatadək aşağı salınmışdır. Bank nəzərdə tutulduğu kimi 2018-ci ildə özəlləşdirməyə açıq elan ediləcəkdir”.

“BANKLAR ŞOK DÖVÜRDƏN UZAQLAŞIBLAR”

İbrahim Alışov qeyd edib ki, bank sektoru şok dövründən uzaqlaşmışdır:

“Bu gün banklar yüksək likvidlik göstəriciləri ilə özlərini konfort zonada hiss edirlər. Bu gün banklar qarşısında duran əsas məsələ mövcud olan  təxminən 6,5 milyard manat likvid vəsaitin real sektora transformasiyasıdır. Eyni zamanda, banklar qarşısındakı əsas məsələlərdən biri qeyri-işlək aktivlərin restrukturizasiya problemlərini aradan qaldırmaqdır”.