Buxarestə AZAL-ın ilk reysi baş tutdu

Buxarestə AZAL-ın ilk reysi baş tutdu

Azərbaycanın milli aviadaşıyıcısı AZAL iyunun 3-də Bakı-Buxarest-Bakı marşrutu üzrə ilk reysini uğurla həyata keçirib.

“Azərbaycan Hava Yolları” aviaşirkətinin təyyarəsi ənənəvi olaraq su tağı ilə qarşılanıb.

Buxarestdə aviaşirkətin ilk reysinin yerinə yetirilməsi münasibətilə təntənəli mərasim keçirilib.

Tədbirdə Azərbaycan Respublikasının Rumıniyadakı səfiri Qüdsi Osmanov, Rumıniyanın Azərbaycandakı səfiri Vasile Soare, Rumıniyanın İqtisadiyyat, Sahibkarlıq və Turizm naziri Ştefan-Radu Oprea, Rumıniyanın İqtisadiyyat, Sahibkarlıq və Turizm Nazirliyinin Turizm Baş İdarəsinin baş direktoru İoana Podosu, Dövlət Turizm Agentliyinin Aparat rəhbəri Kənan Qasımov, Azərbaycan Turizm Bürosunun İdarə Heyətinin sədr müavini Cavanşir Bayramov, “Azərbaycan Hava Yolları” aviaşirkətinin Satış və əməkdaşlıq idarəsinin rəisi Çingiz Mürsəlov, aviaşirkətin Satış və əməkdaşlıq idarəsinin Avropa regionu üzrə nümayəndəsi Kamran Qacar, eləcə də digər rəsmi şəxslər iştirak ediblər.

İştirakçılar öz çıxışlarında Azərbaycan və Rumıniya arasında əlaqələrin möhkəmləndirilməsi, həmçinin qarşılıqlı turizm mübadiləsinin stimullaşdırılması üçün Bakı-Buxarest-Bakı marşrutu üzrə birbaşa aviareyslərin açılmasının vacibliyini vurğulayıblar. Azərbaycanın turizm ölkəsi kimi tanıdılması istiqamətində genişmiqyaslı tədbirlərin həyata keçirildiyi, dövlət səviyyəsində turizmin inkişafına xüsusi diqqət ayrıldığı bildirilib.

Qeyd edilib ki, birbaşa uçuşların açılması Azərbaycanı rumıniyalı turistlər üçün daha əlçatan edəcək və iki ölkə arasında turist axınına müsbət təsir göstərəcək. Turizm əlaqələrinin inkişafı iki ölkənin xalqları arasında dostluq münasibətlərinin daha da möhkəmlənməsinə töhfə verəcəkdir.

Bakı-Buxarest-Bakı marşrutu üzrə uçuşlar həftədə iki dəfə olmaqla bazar ertəsi və cümə axşamı günləri yerinə yetiriləcək. Uçuş cədvəli ilə tanış olmaq və aviabiletləri əldə etmək üçün aviaşirkətin rəsmi saytına keçid ala və ya mobil tətbiqinə daxil ola bilərsiniz.

03.06.2024 17:21

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az