2019-cu ilin doqquz ayında dövlət büdcəsinin icrasına (operativ) dair məlumat

2019-cu ilin doqquz ayında dövlət  büdcəsinin mədaxili 16 milyard 871,2 milyon manat,  xərcləri 16 milyard 690,6 milyon manat olmuş, 180,6 milyon manat məbləğində büdcə artıqlığı (profisit) yaranmışdır.

Bu barədə “Marja”ya Maliyyə nAzirliyindən bildirilib.

Gəlirlər

2019-cu ilin doqquz ayında dövlət büdcəsinin mədaxili 16 milyard 871,2 milyon manat icra olunmuşdur ki, bu da ötən ilin eyni dövrü ilə müqayisədə 4,9 faiz və yaxud 780,6 milyon manat çoxdur.

Azərbaycan Respublikası Vergilər Nazirliyinin xətti ilə dövlət büdcəsinə 5 milyard 608,5 milyon manat məbləğində daxilolmalar təmin edilmişdir ki, bu da 2018-ci ilin eyni dövrü ilə müqayisədə 5,7 faiz və ya 302,6 milyon manat çoxdur.

Həmin vəsaitin 70 faizi və yaxud 3 milyard 928,4 milyon manatı qeyri-neft sektorundan daxilolmaların payına düşür ki, bu da ötən ilin eyni dövrü ilə müqayisədə 438,6 milyon manat və ya 12,6 faiz çoxdur.

2019-cu ilin doqquz ayında Azərbaycan Respublikası Dövlət Gömrük Komitəsinin xətti ilə dövlət büdcəsinə 3 milyard 250,1 milyon manat vəsait təmin edilmişdir ki, bu da ötən ilin eyni dövrü ilə müqayisədə 25  faiz və yaxud 649,7 milyonmanat çoxdur.

Dövlət büdcəsindən maliyyələşdirilən təşkilatların ödənişli xidmətlərindən  daxilolmaları 377,2 milyon manat təşkil etmişdir ki, bu da 2018-ci ilin eyni dövrü ilə müqayisədə 17,3 faiz və ya 55,7 milyon manat çoxdur.

Sair daxilolmalar üzrə büdcəyə  99,4 milyon manat vəsait daxil olmuşdur ki, bu da ötən ilin eyni dövrü ilə müqayisədə 24,6 milyon manat və ya 32,9 faiz çoxdur .

Azərbaycan Respublikasının Dövlət Neft Fondundan dövlət büdcəsinə 7 milyard 536 milyon manat  vəsait transfert edilmişdir.

2019-cu ilin iyul-sentyabr ayları üzrə dövlət büdcəsinin mədaxil proqnozu 6 milyard 465,7 milyon manat icra olunmuşdur ki, bu da 2018-ci ilin eyni dövrü ilə müqayisədə 190,4 milyon manat və ya 3  faiz çoxdur.

Xərclər

2019-cu ilin doqquz ayında dövlət büdcəsinin xərcləri 16 milyard 690,6 milyon manat icra olunmuşdur ki, bu da 2018-ci ilin eyni dövrü ilə müqayisədə 6,5 faiz və ya 1 milyard 24,6 milyon manat çoxdur.

İqtisadi təsnifata uyğun olaraq cari ilin ilk doqquz ayında dövlət büdcəsi xərclərinin 35,3 faizi və ya 5 milyard 888,7 milyon manatı sosialyönümlü xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilmişdir ki, bu da ötən ilin eyni dövrü ilə müqayisədə 8,8 faiz və ya 478,6 milyon manat çoxdur.

2019-cu ilin doqquz ayında dövlət büdcəsi xərclərinin 8 milyard 948,5 milyon manatı və ya 53,6 faizi cari xərclərə, 6 milyard 320,6 milyon manatı və ya 37,9 faizi əsaslı xərclərə, 1 milyard 421,5 milyon manatı və ya 8,5 faizi dövlət borcuna və öhdəliklərinə xidmətlə bağlı xərclərə  yönəldilmişdir. 

Cari ilin iyul-sentyabr ayları üzrə dövlət büdcəsinin xərcləri 5 milyard 739,6 milyon manat icra olunmuşdur. 

İcmal büdcə

Cari ilin doqquz ayında icmal büdcənin gəlirləri 25 milyard 566,7 milyon manat icra olunmuşdur ki, bu da ötən ilin eyni dövrü ilə müqayisədə 1 milyard 694,3 milyon manat və ya 7,1 faiz coxdur. İcmal büdcənin xərcləri 17 milyard 963,6 milyon manat icra olunmuşdur ki, bu da ötən ilin eyni dövrü ilə müqayisədə 1,7 mln. manat çoxdur. İcmal büdcədə 7 milyard 603,1 milyon manat büdcə artıqlığı (profisit) yaranmışdır.