“ABB-İnvest İnvestisiya Şirkəti” QSC Azərbaycan Dövlət İqtisad Universitetində (UNEC) tələbələrinin maliyyə savadlılığının artırılması və investisiya bazarları haqqında praktiki biliklərinin genişləndirilməsi məqsədilə “İnvestisiyaya ilk addım: Maliyyə bazarları və investisiya imkanları” mövzusunda maarifləndirici seminar təşkil edib.Dünən keçirilmiş seminar UNEC tələbələri arasında böyük marağa səbəb olub, iştirakçı sayı 90 nəfəri keçib.

Maarifləndirici və interaktiv formatda baş tutan tədbir zamanı gənclərə maliyyə savadlılığının əsasları, səhm, istiqraz və ETF-lər kimi əsas investisiya alətləri sadə və anlaşılan nümunələrlə təqdim olunub. Seminar çərçivəsində risk və gəlir münasibəti, investisiya portfelinin düzgün formalaşdırılması və diversifikasiya kimi vacib anlayışlar ətraflı izah edilib.

Tədbirin praktiki hissəsində real bazar nümunələri əsasında müxtəlif investisiya yanaşmaları seminar iştirakçılarının diqqətinə çatdırılıb. Eyni zamanda, “ABB Invest”in mobil investisiya imkanları canlı şəkildə nümayiş etdirilərək platformada maliyyə alətlərinin axtarışı, sifarişlərin verilməsi və investisiya portfelinin izlənilməsi prosesi tələbələrə göstərilib.

Seminarın həyəcanlı anlarından biri interaktiv sorğu (“quiz”) mərhələsi olub. Tələbələr QR kod vasitəsilə “Mentimeter” platformasına qoşularaq investisiya və maliyyə bazarları üzrə biliklərini sınayıblar. Düzgün cavabların sayı və cavablandırma sürəti əsasında müəyyən edilən ilk üç yerin qalibinə müvafiq olaraq müxtəlif məbləğlərdə mükafatlar təqdim olunub.

Tədbirin sonunda tələbələrin mövzu ilə bağlı sualları cavablandırılıb, “ABB Invest”də qeydiyyat imkanları barədə geniş məlumat verilib və iştirakçılarla xatirə fotosu çəkdirilib. Təşkil olunan seminar tələbələrin müasir maliyyə bazarları ilə tanışlığı və gələcək investisiya addımları üçün faydalı bir platforma rolunu oynayıb.

Əlaqə üçün:

Suallarınızla bağlı office@abbinvest.az elektron poçt ünvanına müraciət edə, həmçinin *3773 qısa nömrəsi və ya +994 50 268 33 99 mobil nömrəsi vasitəsilə əlaqə saxlaya bilərsiniz.