Leyla Sarabi “Azərpambıq Aqrar Sənaye Kompleksi” MMC-nin İctimaiyyətlə əlaqələr şöbəsinin müdiri vəzifəsinə təyin olunub.

Marja.az-ın əldə etdiyi məlumata görə, o, yeni vəzifəsində şirkətin ictimaiyyətlə və media ilə əlaqələrinin təşkili, korporativ kommunikasiya və informasiya siyasəti istiqamətlərinə cavabdeh olacaq.

Leyla Sarabi media və dövlət qurumlarının ictimaiyyətlə əlaqələr sahəsində uzunmüddətli iş təcrübəsinə malikdir.

O, 2026-cı ilin yanvarında Azərbaycan İnvestisiya Holdinqinin (AİH) İctimaiyyətlə əlaqələr şöbəsinin müdiri vəzifəsinə təyin edilmişdi. Bundan əvvəl isə Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinə rəhbərlik edib. 

Sarabi həmin vəzifədə işğaldan azad edilmiş ərazilərdə aparılan genişmiqyaslı bərpa və yenidənqurma layihələrinin media ilə kommunikasiyasında iştirak edib. O, Ağdam və Füzuli rayonlarında həyata keçirilən yaşayış məntəqələrinin bərpası, əhalinin köçürülməsi və yeni infrastrukturun yaradılması ilə bağlı mütəmadi olaraq mediaya məlumat verib.

İş elanları AzVak.az-da

Leyla Sarabi daha əvvəl Mədəniyyət Nazirliyinin İctimaiyyətlə əlaqələr şöbəsində də çalışıb. Media fəaliyyətinin əvvəlki mərhələlərində AzTV, Mədəniyyət TV, Publika və digər media qurumlarında işləyib və əməkdaşlıq edib.  

“Azərpambıq ASK”da kadr dəyişiklikləri davam edir

Leyla Sarabinin təyinatı “Azərpambıq ASK” MMC-də son günlər aparılan kadr dəyişiklikləri fonunda baş verir. Oktyabrın 5-də yayılan məlumata görə, şirkətin Baş direktoru Fəxri Mehdiyevin əmrləri ilə Fərid İsayev Baş direktorun müavini, Yunis Səfərli maliyyə direktoru, Əminə Axundova isə SƏTƏMM departamentinin müdiri vəzifələrinə təyin olunublar. Büdcələşdirmə və hesabatlılıq istiqamətində də yeni təyinatlar həyata keçirilib.  

“Azərpambıq ASK” MMC 2018-ci ildə yaradılıb. Şirkətin əsas fəaliyyət istiqamətlərinə pambıq istehsalı, fermerlərdən pambığın tədarükü və emalı, həmçinin pambıq mahlıcı, texniki çiyid, pambıq yağı və digər məhsulların satışı daxildir. Rəsmi məlumata görə, şirkətin Azərbaycanın müxtəlif rayonlarında 14 istehsal, emal və tədarük müəssisəsi fəaliyyət göstərir.  

Şirkət ölkənin pambıqçılıq və qeyri-neft ixracı sektorunda fəaliyyət göstərən iri müəssisələrdən biridir.

Hər gün yeni vakansiyalar - AzVak.az-da