Fransanın enerji idarəetməsi və avtomatlaşdırma şirkəti “Schneider Electric” ABŞ-ın proqram təminatı şirkəti PTC-ni təxminən 22,6 milyard dollara almaq barədə razılığa gəlib. Bu, “Schneider Electric”in tarixində ən böyük satınalma əməliyyatıdır.

Marja.az xəbər verir ki, şirkət sövdələşmə ilə sürətlə artan tələbdən faydalanaraq məlumat mərkəzləri istiqamətində fəaliyyətini daha da genişləndirməyi hədəfləyir.

Bununla belə, razılaşmanın həcmi, PTC səhmləri üçün ödənilən yüksək haqq və süni intellektin proqram təminatı sektorunun gələcəyinə təsiri ilə bağlı qeyri-müəyyənlik investorlar arasında narahatlıq yaradıb. Nəticədə “Schneider Electric”in səhmləri Paris birjasında erkən ticarət zamanı təxminən 10% ucuzlaşıb.

Şirkətin səhmləri ilin əvvəlindən ötən cümə gününün bağlanışınadək təxminən 29% bahalaşmışdı. Bazar ertəsi qeydə alınan kəskin ucuzlaşma isə “Schneider Electric”in bazar kapitallaşmasının təxminən 15 milyard avro azalmasına səbəb olub.

ABŞ-ın “Jefferies” investisiya bankı investorlar üçün hazırladığı qeyddə bildirib ki, süni intellektin proqram təminatı sektorunu köklü şəkildə dəyişə biləcəyi ilə bağlı narahatlıqlar şirkətlərin qiymətləndirilməsinə təzyiq göstərməkdə davam edir.

Bankın qiymətləndirməsinə görə, bu vəziyyət PTC-ni son 10 ilin ən aşağı qiymətləndirmə səviyyələrindən birində almağa imkan versə də, sövdələşmə başa çatdıqdan sonra “Schneider Electric” səhmlərinə də əlavə təzyiq yarada bilər.

“Berenberg” analitiki Nay Soe Naing isə Reuters-ə bildirib ki, proqram təminatı sektorundakı mövcud qiymətləndirmələr və investorların ehtiyatlı mövqeyi nəzərə alınarsa, sövdələşmənin qiyməti məqbul görünür.

PTC-nin səhmləri isə ABŞ fond bazarlarının açılışından əvvəlki ticarətdə 34,4% bahalaşıb.

Sövdələşmə “Schneider Electric”in sənaye avtomatlaşdırılması, proqram təminatı və məlumat mərkəzləri biznesini bir-birinə daha sıx inteqrasiya etmək strategiyasının mühüm mərhələsi kimi qiymətləndirilir.

Hər gün yeni vakansiyalar - AzVak.az-da