Avropanın toxumçuluq şirkəti "BC Institute"  və Azərbaycanın “Səba” şirkəti birgə "SERRA Toxum" şirkətinin yaradılması barədə razılığa gəliblər.

“Səba” şirkətinin ictimaiyyətlə əlaqələr bölməsindən "Marja"ya bildirilib ki, 2019-cu il əkin ilinə qoyulmuş investisiyada yeni bir sahənin xüsusi payı var:

“Biz bu il yeni bir addım atıb, ölkədə ilk dəfə olaraq, hibrid qarğıdalı və orijinal soya toxumu yetişdirilməsinə başladıq. Avropanın toxumçuluq üzrə məşhur araşdırma "BC Institute" şirkəti ilə birgə müəsissənin -  "SERRA Toxum"u yaratmağa qərar verdik. Azərbaycanda ilk dəfə olaraq, hibrid toxum əldə etmək məqsədilə "BC Institute" şirkətindən alınan “ana” və “ata” qarğıdalı sortlarının toxumlarını sınaq üçün "Səba"-nın Kürdəmir ərazisindəki sahələrində əkmişik. Hazırda həmin sahələrdə biçin davam edir və yaxın günlərdə ilk hibrid toxumlarımızı əldə edəcəyik. Tək özümüz üçün deyil, ölkəmizin iqtisadi qüdrəti üçün qoyduğumuz bu investisiya idxalı əvəzləmək və bu məhsulların ixracına nail olmaqla, gələcək illərdə yüksək mənfəət vəd edir”- “Səba”-da bu fikirdədirlər.

Ötən həftə Zaqreb şəhərində "BC Institute" şirkətinin baş ofisində olan “Səba” rəhbərliyi və nümayəndələri bu şirkətlə birgə "SERRA Toxum" şirkətinin yaradılması barədə razılığa gəliblər. “Səba”-nın Azərbaycanda hibrid toxum emalı müəssisəsinin əsasını qoymaq istəyini tərəfdaşlar müsbət qarşılayıb və lazımi dəstək verəcəklərini bildiriblər. 

“Səba” şirkəti yeni sahə ilə yanaşı, ənənəvi əkin mövsümündən də yüksək məhsuldarlıq gözləyir.

“Bilirsiniz ki, biz 2012-ci ildən - əkinçiliyə başladığımız vaxtdan bəri ötən müddətdə 2018-ci ildə istədiyimiz kimi yüksək məhsuldarlığa nail olmuşuq. Bu il – 2019-cu ildən də gözləntimiz böyükdür. Biçini başa çatmış bəzi bitkilərdə əldə etdiyimiz məhsuldarlıq bizə bunu söyləməyə imkan verir” - "Səba"dan deyiblər. 

Əkinçiliklə “Səba” ASC-nin əkinçilik müəssisələri Beyləqan, Ağcabədi, Füzuli, Ağsu, Kürdəmir rayonlarında şirkətə məxsus 10 min hektar sahədə növbəli şəkildə buğda, arpa, qarğıdalı, soya, şəkər çuğunduru becərir. Əkin sahələrindən şirkət hələlik 15 min tondan artıq dən qarğıdalı, 3 min tondan artıq arpa, 3 min tona yaxin buğda yığıb. Əldə edilən  buğdanın min tonu toxumluqdur. Qarğıdalı yığımı davam edir. Silos qarğıdalı və soya biçininə isə yenicə başlanıb. Şirkətdən verilən məlumata görə, Səba sahələrində bu il də şəkər çuğunduru əkilib.

“Ölkənin ilk özəl pilot taxılçılıq təsərrüfatı olmağımız bizi bu sahədə həmişə yeniliklər etmək məsuliyyətində qoyur. Təbii resurslardan, xüsusilə, sudan qənaətlə istifadə, torpağa münbitliyi artırmaq və strukturunu qorumaq üçün mineral gübrələrlə yanaşı, “Səba”-nın öz istehsalı olan orqanik gübrə vermək, ilk dəfə olaraq Azərbaycanda böyük sahədə soya becərməyimiz və yem üçün qiymətli bu bitkinin idxalını azaltmağın mümkünlüyünü göstərməyimiz bu məsuliyyətdən irəli gəlir” - şirkətdən bildiriblər.  

Qeyd edək ki, “Səba" 2011-ci ildən əkinçiliklə məşğul olur. “Səba” brendi altında yetişdirilən quşların yemini müəssisənin əkin sahələrində becərilən qarğıdalı və soya təşkil edir.

“Səba” quşlarının peyinindən alınan üzvi gübrə, müasir suvarma sistemləri və düzgün aqrotexnoloji qulluq sayəsində becərilən sağlam məhsul quş və heyvan yemi üçün vacib olan zülalla zəngindir. Buna görə də “Səba” həm də yem istehsalçısı kimi heyvandarlar arasında yüksək nüfuza malikdir.