Minimum əməkhaqqının 180 manatdan 250 manata qaldırılması ilə fiziki şəxs sahibkarların ödədikləri aylıq məcburi dövlət sosial sığorta vəsaiti də artacaqdır.

Ötən ilin sonunda “Sosial sığorta haqqında” qanuna dəyişiklik edilməsinə baxmayaraq, ticarət və tikinti sahələrində sahibkarlıq fəaliyyəti ilə məşğul olan fiziki şəxslər ölkə üzrə müəyyən olunmuş minimum aylıq əməkhaqqının 50 faizi məbləğinin, digər sahələrdə sahibkarlıq fəaliyyəti ilə məşğul olan fiziki şəxslər isə 20 faizi məbləğinin; Bakı şəhərində 100 faizi, Sumqayıt və Gəncə şəhərlərində 90 faizi, respublika tabeli digər şəhərlərdə 80 faizi, rayon mərkəzlərində, digər şəhərlərdə və qəsəbələrdə 60 faizi, kənd yerlərində 50 faizi miqdarında məcburi dövlət sosial sığorta haqqı ödəyirlər. Məsələn, Bakı şəhərində fəaliyyət göstərən fiziki şəxs sahibkar hər ay Vergilər Nazirliyinə 180 manat olan minimum əməkhaqqının 20 faizi miqdarında və ya 36 manat məcburi dövlət sosial sığorta haqqı ödəyir (Köhnə “Sosial sığorta haqqında” qanunun 14-cü maddəsinə uyğun olaraq).

Ötən il “Sosial sığorta haqqında” qanuna edilən dəyişiklik ilə, ticarət və tikinti sahəsində fəaliyyət göstərməyən sahibkarlar üçün nisbət 20%-dən 25%-ə qaldırılmışdır (Məcburi dövlət sosial sığorta haqqı sahibkarlıq fəaliyyəti üzrə – minimum aylıq əməkhaqqının tikinti və ticarət sahələrində 50 faizi, digər sahələrdə 25 faizi miqdarında). Amma qanunda qeyd edilib ki, dəyişiklik 2020-ci il yanvarın 1-dən qüvvəyə minir və həmin tarixədək sosial sığorta haqları 2019-cu il yanvarın 1-dək qüvvədə olan qayda ilə (14-cü maddəsinə uyğun olaraq) ödənilir.

 
Bu ilin Martından minimum əməkhaqqı 130 manatdan 180 manata qaldırıldığından fiziki şəxs sahibkarlar üçün DSMF-yə ödəniş də artmışdır. Bakı şəhərində fəaliyyət göstərənlər, Mart ayından etibarən 180 manatın 20%-i miqdarında, yəni ayda 36 manat DSMF-yə ödəniş edirlər. 2019-cu ilin Martınadək aylıq 26 manat məcburi dövlət sosial sığorta haqqı ödənilirdi.

"Marja"nın məlumatına görə, 2019-cu il sentyabrın 1-dən minimum aylıq əməkhaqqının 250 manata qaldırılması məcburi dövlət sosial sığorta vəsaitinin 50 manata çatması deməkdir (38,9% artacaq).

2020-ci ildən bu məbləğ, minimum əməkhaqqı dəyişməsə, 62,50 manata yüksələcəkdir (minimum əməkhaqqının 25 faizi miqdarında). 

Sentyabrdan digər şəhər və rayonlarda fəaliyyət göstərənlər üçün də aylıq ödəniş artacaqdır: Sumqayıt və Gəncə üzrə 45 manat, respublika tabeli digər şəhərlər üzrə 40 manat, rayon mərkəzləri, digər şəhərlər və qəsəbələr üzrə 30 manat, kənd yerləri üzrə 25 manat.

İyunun 18-də Azərbaycan prezidenti İlham Əliyev Minimum aylıq əməkhaqqının artırılması haqqında sərəncam imzalayıb. Sərəncama əsasən, 2019-cu il sentyabrın 1-dən Azərbaycanda minimum aylıq əməkhaqqı 250 manat təşkil edəcək.