"Bakı Fond Birjası"nın xalis mənfəəti "dövlət kağızları ilə" kəskin artıb

"Bakı Fond Birjası"nın xalis mənfəəti "dövlət kağızları ilə" kəskin artıb

"Bakı Fond Birjası" QSC 2018-ci ili 3 milyon 718 min manat xalis mənfəət ilə başa vurub. Müqayisə üçün qeyd edək ki, QSC 2017-ci ili 1 milyon 471 min manat xalis mənfəət ilə bağlamışdı. Beləliklə, illik müqayisədə Birjanın xalis mənfəəti 2,5 dəfə artıb.

"Marja" Bakı Fond Birjasının illik hesabatına istinadən xəbər verir ki, 2017-ci illə müqayisədə ötən il birjanın cəmi əsas əməliyyat gəlirləri 2 dəfə artaraq 5 milyon 693 min manat təşkil edib. Bakı Fond Birjası 2017-ci ildə 2 milyon 764 min manat cəmi əsas əməliyyat gəliri əldə etmişdi. Dövlət qiymətli kağızlar bazarının (Mərkəzi Bankın notları və Maliyyə Nazirliyinin istiqrazları) artması Birjanın gəlirlərinin yüksəlməsinə səbəb olub.

Ötən il Birjanın 5 milyon 693 min manat cəmi gəlirlərinin 5 milyon 478 min manatını əqdlər üzrə tarif gəlirləri, o cümlədən 4 milyon 890 min manatını Mərkəzi Bankın buraxdığı notlar üzrə, 393 min manatını Maliyyə Nazirliyinin istiqrazları üzrə tarif gəlirləri, 194 min manatını İpoteka Fondunun notları, korporativ istiqrazlar, korporativ səhmlər və repo əməliyyatları üzrə tarif gəlirləri təşkil edib. Əgər Mərkəzi Bankın notları üzrə tarif gəlirləri olmasaydı Bakı Fond Birjasının gəlirləri azalardı və ili zərər ilə başa vurardı. Bu ildən Mərkəzi Bank pul siyasətini yumuşaltmaqla bərabər emissiya etdiyi notları azaldır. Bu da Birjanın tarif gəlirlərinin azalmasına səbəb olacaqdır. Digər qiymətli kağızların buraxılışı üzrə ciddi dəyişikliklər olmasa 2019-cu ildə Bakı Fond Birjasının cəmi gəlirləri azala bilər.

Ötən il faiz gəlirləri daxil Birjanın cəmi gəlirləri 6 milyon 26 min manat, cəmi xərcləri isə 2 milyon 308 min manat təşkil edib. Nəticədə "Bakı Fond Birjası" QSC 2018-ci ili 3 milyon 718 min manat xalis mənfəət ilə başa vurub.