Yaponiyanın “Nissan Motor” şirkəti 2026-cı maliyyə ilinin ilk altı ayında 80 milyard yen (503 milyon ABŞ dolları) əməliyyat mənfəəti əldə edib. Ötən maliyyə ilinin eyni dövründə şirkət 27,7 milyard yen (174 milyon dollar) əməliyyat zərəri açıqlamışdı. Bununla belə, “Nissan” yarımili 39,7 milyard yen (250 milyon dollar) xalis zərərlə başa vurub.

Marja.az “Nissan”ın noyabrın 11-də yaydığı maliyyə açıqlamasına istinadən xəbər verir ki, 2026-cı il sentyabrın 30-da başa çatan altı ayda şirkətin konsolidə edilmiş xalis satış gəlirləri 493,3 milyard yen (3,10 milyard dollar) və ya 8,8 faiz artaraq 6 trilyon 72 milyard yenə (38,19 milyard dollar) çatıb. Bu dövrdə şirkət dünya üzrə 1 milyon 410 min avtomobil satıb.

Xalis zərər 82 faiz azalıb

Ötən ilin eyni dövründə 221,9 milyard yen (1,40 milyard dollar) olan xalis zərər 182,2 milyard yen (1,15 milyard dollar) və ya 82,1 faiz azalıb. Şirkət əməliyyat nəticəsinin yaxşılaşmasını struktur dəyişiklikləri və “Re” bərpa proqramı çərçivəsində xərclərin azaldılması ilə əlaqələndirir. Proqram ilk yarımildə 110 milyard yen (692 milyon dollar) əlavə qənaət təmin edib.

Hesabat dövrünün sonunda avtomobil biznesinin xalis pul mövqeyi təxminən 800 milyard yen (5,03 milyard dollar), pul vəsaitləri və onların ekvivalentləri isə 2 trilyon 200 milyard yen (13,84 milyard dollar) təşkil edib.

İkinci rübdə əməliyyat mənfəəti 96 faizə yaxın azalıb

İyul–sentyabr aylarında “Nissan”ın xalis satış gəlirləri 236 milyard yen (1,48 milyard dollar) və ya 8,2 faiz artaraq 3 trilyon 107,8 milyard yenə (19,55 milyard dollar) çatıb. Əməliyyat mənfəəti isə 51,5 milyard yendən (324 milyon dollar) 2,1 milyard yenə (13 milyon dollar) enib. Azalma 49,4 milyard yen (311 milyon dollar) və ya 95,9 faiz təşkil edib.

Şirkət rüblük əməliyyat mənfəətindəki azalmanı əsasən ötən ilin eyni dövründə ABŞ-da emissiya ilə bağlı xərclərin azalmasından əldə etdiyi üstünlüyün bu il təkrarlanmaması ilə izah edib. Bununla yanaşı, restrukturizasiya ilə bağlı xərclərin azalması fonunda rüblük xalis zərər 106,2 milyard yendən (668 milyon dollar) 43,5 milyard yenə (274 milyon dollar) düşüb. Xalis zərər 62,7 milyard yen (394 milyon dollar) və ya 59 faiz azalıb.

Çin bazarı qlobal satış proqnozunu aşağı salıb

“Nissan” 2026-cı maliyyə ili üçün qlobal satış proqnozunu 3 milyon 150 min avtomobildən 2 milyon 970 min – 3 milyon avtomobil aralığına endirib. Yeni proqnoz əvvəlkindən 150–180 min avtomobil və ya təxminən 4,8–5,7 faiz aşağıdır.

Şirkət ABŞ və Yaponiya üzrə satış gözləntilərini artırıb. Çində isə tələbin zəifləməsi, elektrik və şarj olunan hibrid avtomobillərə keçidin gözləniləndən sürətli getməsi və rəqabətin güclənməsi satışlara təzyiq göstərir. “Nissan” buna cavab olaraq Çində daxiliyanma mühərrikli avtomobillərin istehsalını və diler ehtiyatlarını tənzimləyir, N seriyasının yeni enerji modellərini genişləndirir və ixracı artırır.

ABŞ-da yerli istehsal olunan “Rogue”, “Frontier” və “Pathfinder” modellərinə tələb satış artımını dəstəkləyib. Yaponiyada isə yeni “Elgrand” və “Kicks” modelləri satışlara töhfə verib. İkinci yarımildə şirkət ABŞ-da “Rogue Hybrid”, Meksikada şarj olunan hibrid “Frontier Pro PHEV”, Avropada isə elektrikli “Pixo” modelinə də diqqət ayıracaq.

İllik əməliyyat mənfəəti hədəfi 200 milyard yen (1,26 milyard dollar) olaraq qalır

Qlobal satış proqnozunu azaltmasına baxmayaraq, “Nissan” maliyyə ili üzrə 200 milyard yen (1,26 milyard dollar) əməliyyat mənfəəti hədəfini saxlayıb. Şirkət ikinci yarımildə 120 milyard yen (755 milyon dollar) əməliyyat mənfəəti və maliyyə ilinin sonunda avtomobil biznesi üzrə 1 trilyon yendən (6,29 milyard dollar) yüksək xalis pul mövqeyi gözləyir.

“Nissan” hesab edir ki, ikinci yarımildə satış həcminin artması, yeni modellərin bazara çıxması, daha gəlirli model və komplektasiyaların satışda payının yüksəlməsi, eləcə də xərclərə qənaət valyuta və xammal xərclərindən gələn təzyiqi kompensasiya edəcək. Şirkət həmçinin ilk yarımildə gömrük tarifləri ilə bağlı əldə etdiyi birdəfəlik müsbət təsirin təkrarlanmayacağını nəzərə alır.

Şirkət yeni biznes planını 2027-ci ilin fevralında açıqlamağı nəzərdə tutur.

Səhmləri 5,22 faiz düşüb

Yaponiyanın Nissan Motor şirkətinin səhmləri Tokio birjasında 5,22 faiz ucuzlaşıb. Avtomobil istehsalçısının ikinci maliyyə rübündə əməliyyat mənfəəti illik müqayisədə 96 faiz azalaraq 2 milyard 100 milyon yenə (13 milyon dollar) enib. Nissan azalmanı əsasən əvvəlki ilin eyni dövründə ABŞ-da emissiyalarla bağlı xərclərin aşağı olmasının yaratdığı müsbət təsirin bu dəfə təkrarlanmaması ilə izah edib.

Şirkət 2027-ci ilin martında başa çatacaq maliyyə ili üzrə qlobal satış proqnozunu 3 milyon 150 min avtomobildən 2 milyon 970 min – 3 milyon avtomobil aralığına endirib. Nissan-ın baş direktoru İvan Espinosa bildirib ki, şirkət dünya bazarlarında Çin istehsalçıları ilə rəqabət aparmaq üçün Çində hazırlanmış avtomobillərin ixracını genişləndirməyi planlaşdırır. 

Hesabat göstəriciləri “Nissan”ın Çindəki “Dongfeng-Nissan” birgə müəssisəsində iştirak payı metodu ilə hesablanıb. Bu səbəbdən birgə müəssisənin gəlirləri və əməliyyat mənfəəti cədvəldəki müvafiq konsolidə edilmiş göstəricilərə daxil edilmir.

Hesablamada 1 ABŞ dolları üçün 159 yen əsas götürülüb.