Azərbaycanda lotereya və idman mərc oyunları operatorlarına ümumi oyun gəliri (GGR – gross gaming revenue) modeli üzrə vergitutma rejimini seçmək hüququnun verilməsi təklif olunur.

Marja.az xəbər verir ki, bu barədə Dövlət Vergi Xidmətinin 2027-ci ilin büdcə-vergi siyasəti çərçivəsində hazırlanmış dəyişikliklər layihəsinin təqdimatında bildirilir.

MƏRC VƏ LOTEREYA OPERATORLARINA YENİ VERGİ REJİMİ

Təqdimata əsasən, lotereya və idman mərc oyunlarında GGR modeli üzrə vergi rejiminin tətbiqi nəzərdə tutulur. Operatorlar üçün dövriyyədən 6 faiz vergi rejimi saxlanılmaqla, onlara ümumi oyun gəlirindən vergitutma modelini seçmək hüququ veriləcək. Yeni modelə əsasən, vergi bazası toplanan məbləğdən ödənilmiş uduşlar çıxıldıqdan sonra qalan gəlir əsasında müəyyən ediləcək.

Təqdimatda GGR modeli üzrə hesablama aşağıdakı kimi göstərilir:

Toplanan məbləğ – Ödənilmiş uduşlar = GGR – vergi bazası.

Beləliklə, lotereya və idman mərc oyunları operatorlarına mövcud dövriyyədən 6 faiz vergi rejimi ilə yanaşı, GGR modelini seçmək hüququnun verilməsi nəzərdə tutulur.

VERGİ BƏYANNAMƏLƏRİNİN AVTOMATİK TƏSDİQİ

Vergi inzibatçılığının təkmilləşdirilməsi istiqamətində əvvəlcədən doldurulmuş bəyannamələrin avtomatik təsdiqi prosesinin hüquqi mexanizmlərinin müəyyən edilməsi təklif olunur.

Təqdimatda bu istiqamət “Pre-filling” mexanizmi kimi göstərilib.

VERGİ BORCLARINA MÖHLƏT VERİLMƏSİ SADƏLƏŞDİRİLİR

Layihədə vergi borclarına möhlət verilməsi hüququnun avtomatlaşdırılması və tətbiq şərtlərinin sadələşdirilməsi nəzərdə tutulur. Bu çərçivədə əlavə sənədlərin təqdim edilməsinə dair tələbin aradan qaldırılması təklif edilir.

ƏDV DEPOZİT HESABLARI ÜZRƏ NƏZARƏT

Vergi inzibatçılığı sahəsində nəzərdə tutulan digər dəyişiklik vergi orqanına ƏDV depozit hesabı üzrə aparılan əməliyyatları monitorinq etmək səlahiyyətinin verilməsidir.

Dövlət Vergi Xidmətinin təqdimatında bu dəyişikliklərdən gözlənilən nəticələr kimi borcların könüllü ödənilməsi, hesabatlılığın təkmilləşdirilməsi və mərc bazarında şəffaf vergitutma göstərilir.