ABŞ-da keçirilən aralıq seçkilərdə Demokratlar Partiyasının Konqresin hər iki palatasına nəzarəti ələ keçirməyə yaxınlaşması qlobal maliyyə bazarlarında risk iştahasını azaldıb. Seçkilərin ilkin nəticələrinin Prezident Donald Tramp administrasiyasının siyasətinin həyata keçirilməsinə maneələr yarada biləcəyi gözləntilərini gücləndirməsi fonunda ABŞ fond indekslərinin fyuçersləri və dollar ucuzlaşıb, ABŞ dövlət istiqrazlarının qiymətləri isə yüksəlib.

Marja.az xəbər verir ki, Bakı vaxtı ilə saat 10:00-a olan məlumata görə, S&P 500 indeksinin fyuçersləri günün əvvəlində qeydə alınan 0,5 faizlik artımı itirərək 1,3 faiz geriləyib. Texnologiya şirkətlərinin üstünlük təşkil etdiyi Nasdaq 100 indeksinin fyuçersləri isə 2,3 faiz ucuzlaşıb.

Qızılın qiyməti 2% artaraq 4006 dolları keçib. 

Mənfi tendensiya Asiya bazarlarında və kriptovalyuta sektorunda da müşahidə olunub. MSCI Asiya-Sakit okean indeksi 1,8 faiz, Bitcoin isə 2,5 faiz dəyər itirib.

Demokratların güclənməsi texnologiya sektorunda narahatlığı artırır

Pepperstone şirkətinin strateqi Dilin Wu bildirib ki, Demokratların seçkilərdə daha güclü nəticə göstərməsi bazarlarda qeyri-müəyyənliyi artırıb. Bu, xüsusilə şirkətlərə münasibətdə tənzimləmələrin sərtləşdirilməsi və süni intellekt sahəsinə yönəldilən xərclərin daha ciddi nəzarətə götürülməsi ehtimalı ilə əlaqədardır.

Ekspertin fikrincə, texnologiya şirkətlərinin səhmlərinin qiymətləndirilməsi onsuz da təzyiq altında olduğundan seçkilərin nəticələri satış dalğasının yeganə səbəbi deyil. Əksinə, siyasi hadisələr investorların mövcud narahatlıqlarını daha da gücləndirir.

Dollar ucuzlaşıb, ABŞ dövlət istiqrazlarının gəlirliliyi azalıb

Seçkilərin ilkin nəticələri valyuta və istiqraz bazarlarına da təsir göstərib. ABŞ dolları G10 ölkələrinin əksər valyutaları qarşısında dəyər itirib. ABŞ-ın 10 illik dövlət istiqrazlarının gəlirliliyi 6 baza bəndi azalaraq 4,90 faizə enib.

Dövlət istiqrazlarının gəlirliliyi bütün müddətlər üzrə aşağı düşüb. Ən ciddi azalma isə beşillik istiqrazlarda qeydə alınıb. Bu istiqrazların gəlirliliyi 9 baza bəndinədək azalaraq 4,68 faizə geriləyib.

Valyuta bazarında İsveçrə frankı dollar qarşısında 0,7 faiz bahalaşaraq ən yüksək artım nümayiş etdirən valyuta olub. Yaponiya yeni 0,6 faiz, avro isə 0,4 faiz möhkəmlənib.

Ekspert: Dolların taleyi süni intellekt sektorundan asılı vəziyyətə düşüb

Credit Agricole CIB-nin strateqi David Forrester bildirib ki, ABŞ dollarının zəif nöqtəsi üzə çıxıb və Amerika valyutasının gələcək taleyi getdikcə daha çox süni intellekt sektorundakı investisiya bumundan asılı vəziyyətə düşür.

Ekspertin fikrincə, Demokratların seçkilərdə böyük uğur qazanması məlumat mərkəzlərinə investisiyaların məhdudlaşdırılmasına və süni intellekt sektorunun inkişafının ləngiməsinə səbəb ola bilər.

Forrester hesab edir ki, belə bir siyasi dəyişiklik ABŞ dolları üzərində əlavə təzyiq yarada bilər.

Hər gün yeni vakansiyalar - AzVak.az-da