Qobal ərzaq qiymətləri yüksəliş trendindədir. Qlobal ərzaq qiymətləri noyabrda oktyabr ayı ilə müqayisədə 0,5 faiz, ötən ilin noyabr ayı ilə müqayisədə isə 5,7% artıb.

Noyabr ayında bitki yağı qiymətlərinin artması ilə əlaqədar dünya ərzaq qiymətləri 2023-cü ilin aprelindən bəri ən yüksək səviyyəyə qalxıb.

Taxıl, yağlı bitkilər, süd məhsulları, ət və şəkərin qiymətlərində aylıq dəyişiklikləri izləyən Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) tərtib etdiyi dünya ərzaq qiymətləri indeksi oktyabrdakı 126,9 səviyyəsindən (yenilənmiş göstərici) noyabrda 127,5-ə yüksəlib. 

Oktyabr ayında ərzaq qiymətləri indeksi daha əvvəl 127,4 olaraq açıqlanmışdı.

FAO Bitki Yağı Qiymətləri İndeksi noyabr ayında aylıq müqayisədə 7,5 faiz artaraq iki ayda ikinci ən böyük artımını qeyd edib və bir il əvvəlki səviyyədən 32 faiz yüksək olub. Qlobal palma yağı qiymətləri Cənub-Şərqi Asiyada yağan güclü yağışlar səbəbindən istehsalın gözləniləndən aşağı olacağına dair narahatlıqlar səbəbindən daha da artıb. Dünya soya yağı qiymətləri qlobal idxal tələbi ilə yüksəlib, kolza və günəbaxan yağının kotirovkaları da artıb.

FAO Süd Məhsullarının Qiymətləri İndeksi, tam süd tozu üçün qlobal idxal tələbinin bərpası ilə əlaqədar olaraq, noyabr ayında aylıq 0,6 faiz artaraq yüksəliş tendensiyasını davam etdirib. Qərbi Avropada güclü tələb və məhdud ehtiyatlar səbəbindən kərə yağının qiyməti yeni rekord həddə çatıb.  

Noyabrda digər alt indekslər düşüb

FAO-nun Taxıl Qiyməti İndeksi əvvəlki illə müqayisədə 2,7 faiz azalıb. Qlobal buğda qiymətləri beynəlxalq idxal tələbinin zəifləməsi və Cənub yarımkürəsində davam edən məhsul yığımı ilə təklifin artması səbəbindən aşağı düşüb. Qarğıdalı qiymətləri sabit qalıb. Bazar rəqabətinin artması, məhsul təzyiqi və valyuta məzənnəsinin dəyişməsi nəticəsində düyü qiymətləri noyabr ayında 4 faiz ucuzlaşıb.

FAO Şəkər Qiymət İndeksi noyabr ayında aylıq 2,4% azalıb. Hindistan və Taylandda əzmə mövsümünün başlaması və son yağışların torpağın nəmliyini yaxşılaşdırdığı Braziliyada gələn il şəkər qamışı məhsulu ilə bağlı narahatlıqların azalması indeksin düşməsinə səbəb olub.

FAO-nun Ət Qiymətləri İndeksi noyabr ayında Avropa İttifaqında donuz ətinin qiymətinin aşağı düşməsi, təklifin bolluğu, qlobal və yerli tələbatdakı durğunluq səbəbindən 0,8 faiz azalıb. Dünya mal-qara və quş ətinin qiymətləri bir qədər azalıb, beynəlxalq mal əti kotirovkaları sabit qalıb, Braziliya ixrac qiymətlərindəki artım Avstraliya qiymətlərindəki azalma ilə kompensasiya edildib.