“Azərsun Holdinq”ə daxil olan “Azərbaycan Sənaye Bankı” ASC 2017-ci ilin birinci yarısını 4 milyon 241 min manat xalis mənfəət ilə başa vurub. Bank ötən ilin 1-ci yarısında 4 milyon 522 min manat xalis mənfəət açıqlamışdı.

“Marja” Bankın hesabatlarına istinadən xəbər verir ki, cari ilin yanvar-iyun aylarında “Azərbaycan Sənaye Bankı”nın cəmi gəlirləri (faiz və qeyri-faiz) 17 milyon 241 min manat təşkil edib. Bank 2016-cı ilin eyni dövründə 13 milyon 566 min manat gəlir əldə etmişdi.

Müqayisə olunan dövrdə Bankın əməliyyat mənfəəti 5 milyon 494 min manatdan 5 milyon 433 min manata düşüb.

AKTİVLƏRİ 2-Cİ RÜBDƏ AZALIB

31 İyun 2017-ci il tarixində “Azərbaycan Sənaye Bankı” nın cəmi aktivləri 935 milyon 523 min manat, cəmi öhdəlikləri 846 milyon 599 min manat, cəmi kapitalı isə 88 milyon 923 min manat təşkil edib. Ötən ilin sonunda Bank 787 milyon 179 min manat cəmi aktivlərə, 702 milyon 525 min manat cəmi öhdəliklərə və 84 milyon 653 min manat cəmi kapitala malik idi.

31 Mart 2017-ci il tarixinə “Azərbaycan Sənaye Bankı” 949 milyon 375 min manat cəmi aktivlərə, 862 milyon 547 min manat cəmi öhdəliklərə, 86 milyon 827 min manat cəmi kapitala malik idi.

BANKLARA DEPOZİT YERLƏŞDİRMƏKLƏ MƏŞĞULDUR

“Azərbaycan Sənaye Bankı”nın aktivlərinin artması banklardakı depozitlərinin 442 milyon 675 min manatdan 582 milyon 817 min manata qalxmasıdır.  Bank vəsaitləri iqtisadiyyata, xüsusilə adına uyğun sənayeyə ayırmaqdansa, depozit şəkilində yerli və xarici banklara yerləşdirir. Bank ilk 6 ayda kreditlər üzrə  6,70 milyon manat faiz gəliri, banklardakı depozitlərindən isə 5,9 milyon manat gəlir əldə edib.

“Azərbaycan Sənaye Bankı”nın kredit portfeli maliyyə institutlarındakı depozitlərindən iki dəfəyə yaxın azdır. Bu ilin birinci yarısında Bankın müştərilərə verdiyi kreditlər 297 milyon 418 min manatdan 281 min 871 min manata geriləyib.

“Azərsun Holdinq”ə daxil olan “Azərbaycan Sənaye Bankı”nın səhmlərinin 94,2517 %-i “Anadolu İnvestment Kompani” MMC –yə, 5,1735 %-i “Azərbaycan Sənaye Sığorta” ASC –yə və 0,5748 %-i “Azərbaycan Sənaye Lizinq” MMC –yə məxsusdur.