Dövlətə 69 min 881 manat 77 qəpik vergi borcu olan “MƏİŞƏT İST” MMC şirkəti Təhsil Nazirliyinin tenderində qalib elan edilib. Bu barədə məlumat dövlət satınalmalarının vahid internet portalında 20 Fevral 2023-cü il tarixində dərc edilib. 

Marja.az xəbər verir ki, "2023-cü ildə Bərdə rayon ərazisində yerləşən bütün məktəbəqədər təhsil müəssisələrinin yeməklə təchizatının satınalınması" ilə bağlı tender yekunlaşıb. Tenderin qalibi  “MƏİŞƏT İST” MMC şirkətidir.

Təhsil Nazirliyinin təsərrüfat hesablı Əsaslı Tikinti və Təchizat İdarəsi “MƏİŞƏT İST” MMC şirkəti ilə məbləği 3 milyon 150 min manat olan müqavilə imzalanıb.

Dövlət Vergi Xidmətinin məlumatına görə, 20.02.2023-cü il tarixinə “MƏİŞƏT İST” MMC  69 min 881 manat 77 qəpik vergi borcu var.

"Dövlət satınalmaları haqqında" qanuna görə, malgöndərənlərin (podratçıların)  Azərbaycan Respublikasında vergilərə və digər icbari ödənişlərə dair yerinə yetirilməsi vaxtı keçmiş öhdəlikləri olmamalıdır.

Həmçinin oxu

2023-cü ildə bağçaları yeməklə təchiz edəcək bəzi şirkətlər məlum oldu - 31,7 MİLYON MANAT ALACAQLAR

Tender elanı 16.12.2022-ci il tarixində dərc edilib. Tenderin nəticəsi barədə məlumat isə 20.02.2023-cü il tarixində ictimaiyyətə açıqlanıb. Qalib şirkət ilə bağlanmış müqavilə 06.01.2023 - 31.12.2023 dövrünü əhatə edir. Ehtimal da olunur ki, Təhsil Nazirliyi “MƏİŞƏT İST” şirkəti ilə müqaviləni 20.02.2023-cü il tarixindən öncə bağlayıb, həmin vaxt şirkətin vergi borcu olmayıb. Borc müqavilə bağlandıqdan sonra yarana bilər. 

ŞİRKƏTİN RƏHBƏRİNDƏN REAKSİYA

"MƏİŞƏT İST" MMC-nin rəhbəri Nicat Cəfərov bildirib ki, tender keçirilərkən şirkətin vergi borcu olmayıb:

"Hər hansı tender keçirilərkən qaydalara uyğun olaraq vergi borcu ilə bağlı arayış təqdim edilir. Şirkətin vergi borcu olduğu halda tenderə buraxılmır. Yəni, "MƏİŞƏT İST" MMC-nin tender keçirilərkən hər hansı bir vergi borcu olmayıb: "Tender keçiriləndən sonra bu il 6 min manat vergi öhdəliyi yaranıb, qarşılığında 10 min manat ödəniş etmişik. Hətta 4 min manat artıq ödəməmiz yaranıb".

Nicat Cəfərov qeyd edib ki, məsələ ilə bağlı Dövlət Vergi Xidməti ilə əlaqə saxlanılıb. Qurumdan bildirilib ki, 3 iş günü ərzində sistemdə göstərilən borc silinəcək.