(®) Bu gün Gəncə şəhərində “Gəncə inşaat və avtomobil bazarı” MMC-nin ərazisində Türk iş adamı Qiyas Akkurtun rəhbəri olduğu “Galaksi” şirkətinin açılış mərasimi baş tutub.

Açılış nitqi ilə Gəncə şəhər İcra hakimiyyətinin başçısı Niyazi Bayramov, müavini Səməd Tomuyev, “Gəncə inşaat və avtomobil bazarı” MMC-nin direktoru Şahin Qarayev çıxış ediblər. Onlar müəssisənin fəaliyyətinin Gəncə və ətraf ərazilərin iqtisadi inkişafında xüsusi yeri olacağını vurğulayıblar.

Daha sonra, “Galaksi” şirkətinin rəhbəri Qiyas Akkurt çıxış edib.

Açılışda YAP Gəncə şəhər təşkilatının sədri, Gəncə şəhər icra hakimiyyətinin nümayəndələri, Türkiyə Cumhuriyyətinin Gəncə şəhər konsulluğunun nümayəndələri, Gəncə regional KOB evinin nümayəndələri, İqtisadiyyat nazirliyinin nümayəndələri və digər iş adamları iştirak ediblər.

Burada şrkətin iki istehsal sahəsi üzrə fəaliyyəti olacaqdır. Birinci sahə “Galaksi Tekstil” ev tekstil məhsulları istehsalı fabriki, ikinci sahə isə “Galaksi Shaika” Qranit tava və qazan dəstləri istehsalı zavodudur. “Galaksi” şirkətinin bu istehsal sahələri, ev tekstili məhsulları istehsalı sahəsində Gəndə-Qazax iqtisadi zonasında ilk, qranit qazan və tava istehsalı sahəsində isə, Azərbaycanda ilk belə bir istehsal sahəsidir. Hər fabrikdə 100 nəfərdən çox işçi heyəti çalışır. Bu da regional sosial-iqtisadi inkişafa öz töhfəsini verəcəkdir. “Galaksi Tekstil” fabrikinin aylıq istehsal gücü 5000 dəst təşkil edir. Burada yorğan, döşək, və onların üzlüklərinin hər birindən 5 ədəd olmaqla dəst istehsalı nəzərdə tutulur.

“Galaksi Shaika” qranit fabrikinin də istehsal gücü aylıq 5000 dəst təşkil edir. Burada da, müxtəlif ölçülərdə və həcmdə qranit tavalar, qazanlar istehsalı həyata keçirilir. Qiyas Akkurt vurğulayıb ki, bu iki istiqamət üzrə fəaliyyətin gələn il üçün daha da inkişaf etdirilməsi planlaşdırılır. Bunun üçün “Gəncə inşaat və avtomobil bazarı” MMC-də böyük şərait vardır. Bu kompleksdə digər sahibkarların da, fəaliyyət göstərməsi üçün münbit şərait mövcuddur.

Qeyd edək ki, “Galaksi” şirkəti ölkəmizdə 20 ildən çoxdur ki, fəaliyyət göstərir.