Azərbaycanın iri supermarketlər şəbəkəsi zərərdən mənfəətə keçib

Azərbaycanın iri supermarketlər şəbəkəsi zərərdən mənfəətə keçib

"Grandmart" supermarketlər şəbəkəsi ötən il 132 milyon manata yaxın satış və digər gəlirlərinə qarşı 8 min 776 manat xalis mənfəət əldə edib.

Azərbaycanın iri supermarketlər şəbəkəsi zərərdən mənfəətə keçib

"Grandmart" supermarketlər şəbəkəsini idarə edən "Grand - Mart" MMC 2021-ci ili 8 min 776 manat xalis mənfəət ilə başa vurub. Halbuki, şirkət 2020-ci ili 207 min 473 manat xalis zərər ilə bağlamışdı.

Marja.az "Grand - Mart"ın audit hesabatına istinadən xəbər verir ki, 2021-ci ildə şirkətin əsas əməliyyat gəlirləri (satış) 22 milyon 58 min manat və ya 22,1% artaraq 126 milyon 133 min manat təşkil edib. 2020-ci ildə "Grand - Mart"ın əsas əməliyyat gəlirləri 104 milyon 76 min manat təşkil etmişdi. Şirkətin digər gəlirləri isə 2 dəfə artaraq 5 milyon 698 min manat olub.

Ötən il "Grand - Mart"ın 131 milyon 831 min 401 manat cəmi gəlirlərinə qarşı cəmi xərcləri 131 milyon 822 min 624 manat təşkil edib.

31 Dekabr 2021-ci il tarixində "Grand - Mart" MMC 59 milyon 960 min manat cəmi aktivlərə malik olub. Şirkət 2020-ci ilin sonunda 34 milyon 613 min manat cəmi aktivlərə malik idi. Beləliklə, ötən il "Grand - Mart" 73% böyüyüb.

Ötən ilin sonunda "Grand - Mart" MMC-nin nizamnamə kapitalı 12 milyon 20 min manat təşkil edib.

"Grandmart" supermarketlər şəbəkəsi 20 ildir fəaliyyət göstərir. Paytaxt Bakı şəhərində ilk filialı ilə fəaliyyətə başlayan "Grandmart" supermarketlər şəbəkəsi filiallarını açaraq və "Avromart", "Səbət", "Yaxın", "Fresco" supermarketlərini də öz əhatə dairəsinə qataraq böyüməyə nail olmuşdur.

Qeyd edək ki, İyunun 15-də “Grandmart”, “Bolmart”, “Megastore” və “Baqqal” markalarını özündə birləşdirən supermarketlər şəbəkəsinin 78-ci filialı olaraq “Megastore Quba” fəaliyyətə başlayıb.