“Fitch Ratings” reytinq agentliyi Azərbaycan Mərkəzi Bankının (AMB) uçot dərəcəsini 7,5%-ə qədər yüksəldəcəyini gözləyir.

Bu barədə agentliyin Azərbaycan üzrə yeni hesabatında bildirilib.

“Ərzaq, nəqliyyat və dövlət tərəfindən nəzarət olunan qiymətlərin təzyiqi ilə illik inflyasiya apreldəki 4,3%-dən sentyabrda 8,5%-ə qədər yüksəldi və "Fitch" uçot dərəcəsinin 7,5%-ə artırılacağını və ilin sonunda inflyasiyanın 7,6% səviyyəsində olacağını proqnozlaşdırır”, - hesabatda qeyd olunub.

Xatırladaq ki, oktyabrın 29-da AMB uçot dərəcəsini 6,5%-dən 7%-ə, faiz dəhlizinin aşağı həddini 6%-ə, faiz dəhlizinin yuxarı həddini isə 7%-dən 8%-ə yüksəldib.

Azərbaycanda inflyasiya 4,3%-ə qədər yavaşlayacaq 

"Fitch Ratings" reytinq agentliyi bu ilin sonuna Azərbaycanda illik inflyasiyanın 7,6% səviyyəsində olacağını gözləyir. Gələn ilin istehlakçı qiymətlərinin artım tempinin azalacağı və illik inflyasiyanın 2022-ci ilin sonuna 4,3%-ə qədər yavaşlayacağı proqnozlaşdırılır.

Qeyd edək ki, Azərbaycan İqtisadiyyat Nazirliyinin son proqnozuna görə, 2021-ci ilin sonuna dövlət tənzimlənməsi tətbiq edilən qiymətlərin yüksəlməsi (enerji və qeyri-enerji) və qlobal əmtəə qiymətlərinin artması kimi xərc amillərinin təsiri ilə bu il Azərbaycanda 6% səviyyəsində gözlənilən ortaillik inflyasiya 2022-ci ildə 4%-dək yavaşlayacaq.

Beynəlxalq Valyuta Fondunun son proqnozuna görə isə, bu il Azərbaycanda istehlak qiymətləri illik 4,4%, 2022-ci ildə isə 3,2% artacaq.

Son məlumatlara görə, 2021-ci ilin yanvar-oktyabr aylarında ölkədə istehlak qiymətləri illik müqayisədə 5,7%, təkcə oktyabrda isə illik inflyasiya 10%-ə çatıb.

Həmçinin oxu

“Fitch” Azərbaycanın defolt reytinqini təsdiqlədi

Fitch”: Bu il Azərbaycan iqtisadiyyatı 4,9%, gələn il isə 2,9% artacaq

“Fitch Ratings” reytinq agentliyinin son proqnozuna görə, bu il Azərbaycan iqtisadiyyatı 4,9%, 2022-ci ildə isə 2,9% artacaq. Artımın əsas drayverləri kimi, qeyri-neft sektorunun bərpası və COVID-19 pandemiyasına qarşı vaksinasiyanın sürətlənməsi göstərilir.

Uzunmüddətli proqnozlara gəldikdə, 2023-cü ildə real ÜDM-in 2,3%-lik artımı proqnozlaşdırılır.

Gələn ilə iqtisadi artımın yavaşlamasını “Fitch” ölkədə enerji istehsalının durğunluğu (köhnə yataqlardan neft hasilatının davamlı azalması qaz sektorundakı artım ilə kompensasiya olunacaq) və qeyri-neft özəl sektoruna yönələn investisiyaları, iqtisadi diversifikasiyanı və ümumi real artımı məhdudlaşdıran dövlət sektorundakı struktur sərtlikləri ilə izah edir.

Qeyd edək ki, Azərbaycan İqtisadiyyat Nazirliyinin real ÜDM üzrə proqnozlarına görə isə, neftin bir barelinin ortaillik qiyməti 50 ABŞ dolları götürülməklə hazırlanmış makroiqtisadi proqnoz göstəricilərinə əsasən, cari ildə Azərbaycanda real ÜDM 5,1% artacaq. 2022-ci il üçün isə ÜDM-in real artımının 3,9% olacağı proqnozlaşdırılır.

Xatırladaq ki, 2020-ci ölkədə real ÜDM 4,3% azalıb. 2019-cu ildə Azərbaycanda nominal ÜDM istehsalı 81,681 mlrd. manat təşkil edib, real ÜDM-in artım tempi isə 2,2% olub.

Telegramda Marja.az səhifəsinə abunə olun

APA