İqtisadiyyat Nazirliyinin dəstəyi və müvafiq qurumlarının məsul şəxslərinn iştirakı, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə ticarət şəbəkələrinin rəhbərləri ilə görüş keçirilib.

Görüşdə İqtisadiyyat naziri Mikayıl Cabbarov vurğulayıb ki, dövlət başçısı sahibkarlığın inkişafına böyük diqqət və qayğı göstərir, biznesin inkişafı daim dövlət tərəfindən dəstəklənir. Bu baxımdan, ticarətlə məşğul olan sahibkarların fəaliyyətinin genişlənməsi üçün də əlverişli şərait yaradılıb. Ticarət sahəsində fəaliyyət göstərən sahibkarlar koronavirus pandemiyasının mənfi təsirlərinin azaldılması, biznesin dəstəklənməsi, iş yerlərinin qorunub saxlanması məqsədilə dövlət tərəfindən göstərilən dəstək tədbirlərindən yararlanıblar.

Diqqətə çatdırılıb ki, aparılan islahatlar, liberallaşdırma, formalaşmış bazar iqtisadiyyatı digər sahələrlə yanaşı, ticarətin də inkişafı üçün əlverişli şərait yaradıb, pərakəndə ticarət sferası, bazarın həcmi son illər ərzində daha da genişlənib. Bu sahənin inkişafında ticarət şəbəkələri xüsusi rola malikdir. Ticarət şəbəkələri bazarı mal və xidmətlərlə təchiz edərək, əhalinin istehlak mallarına tələbatını ödəyir. Qeyd edilib ki, ticarət şəbəkələri pandemiya dövrünün məhdudiyyətlərinə baxmayaraq, fəaliyyətlərində dayanıqlılığı, təchizat zəncirinin davamlılığını, istehlakçıların tələblərinin tam və dolğun ödənilməsini təmin edib.

 İqtisadiyyat naziri əmək münasibətlərinin leqallaşdırılmasına, satış əməliyyatlarına ictimai nəzarətin gücləndirilməsinə istiqamətlənmiş tədbirlər, vergi qanunvericiliyində ticarət, o cümlədən pərakəndə ticarət sahəsində sahibkarların vergi yükünün optimallaşdırılması, fəaliyyətinin stimullaşdırılması məqsədilə güzəşt və azadolmaları ehtiva edən dəyişikliklər barədə məlumat verib, görüşün əsas məqsədinin ticarət şəbəkələrinin qarşılaşdığı çətinliklərin öyrənilməsi və həlli istiqamətində tədbirlərin müəyyənləşdirilməsi olduğunu qeyd edərək, görüş iştirakçılarını fəal müzakirələrə, açıq dialoqa dəvət edib.

İqtisadiyyat Nazirliyinin tabeliyində Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov görüşün dövlət-biznes dialoqu çərçivəsində həyata keçirilən tədbirlərin davamı olduğunu, sektorda mövcud vəziyyətin və sahibkarların gözləntilərinin öyrənilməsi, bu sahədə atılacaq addımların müzakirəsi baxımından əhəmiyyətini vurğulayıb, iri ticarət şəbəkələri və KOB-lar arasında münasibətlər, müvafiq sahənin tənzimlənməsi istiqamətində görüləcək işlər barədə məlumat verib.

 “Ticarət şəbəkələrinin inkişafı” İctimai Birliyinin sədri Samir Abdullayev rəhbəri olduğu qurumun fəaliyyəti və nəzərdə tutulan tədbirləri, ticarət şəbəkələrinin işinin istehlakçı məmnunluğunun yüksəldilməsinə uyğun qurulması barədə fikirlərini bölüşüb.

Ticarət şəbəkələrinin rəhbərləri qarşılaşdıqları məsələlər barədə danışıb, pərakəndə ticarətin keyfiyyətinin daha da yaxşılaşdırılması istiqamətində təkliflərini səsləndiriblər.

 Görüşdə müzakirələr aparılıb, suallar cavablandırılıb.