“2020-ci ildə kredit bazarında faiz dərəcələri aşağı düşüb”.

Marjanın məlumatına görə, bunu PAŞA Bankın ötən ilki fəaliyyətinin və 2018-2020-ci illəri əhatə edən Strateji dövrünün nəticələrinə həsr olunan mətbuat konfransında Bankın İdarə heyətinin sədri və Baş İcraçı direktoru Taleh Kazımov bildirib.

Onun sözlərinə görə kredit faizlərinin geriləməsinin əsas səbəbi bazardakı kifayət qədər likvidlikdir: “Səhv etmirəmsə bank sektorunda 9 milyard manat civarında likvidlik yaranıb və bu da kredit faizlərinin aşağı düşməsinə imkan yaradır”.

Taleh Kazımov qeyd edib ki, PAŞA Bankın kredit portfeli üzrə orta faiz dərəcəsi 11%-dir: “PAŞA Bankın faiz dərəcələrinin yüksək olması ilə razılaşa bilmərəm, bizim faiz dərəclərimiz kifayət qədər aşağıdır. Ümumi portfel üzrə orta faiz dərəcəsi 11%-dir. Kiçik və orta sahibkarlıq portfeli üzrə orta faiz dərəcəsi isə 13,5%-dir. Bu seqment üzrə faizin nisbətən yüksək olması risklər ilə əlaqədardır”.

Bankın sədri əlavə edib ki, faiz dərəcəsinə əməliyyat xərcləri, cəlb olunmuş vəsaitin qiyməti və risk marjası təsir edir.

 4 SAATA KREDİT ALMAQ MÜMKÜNDÜR

Taleh Kazımov qeyd edib ki, bu gün kiçik və orta sahibkarlar  banka gəlmədən, girovsuz 250 min manatadək kredit ala bilərlər:

“Kiçik və orta sahibkarlarlıq seqmentində fəaliyyətimizi genişləndirmək məqsədilə regionda ilk dəfə onlayn kredit məhsulumuzu təqdim etmişik. Kiçik və orta sahibkarlıq seqmentinə daxil olan fiziki  və hüquqi şəxslər onlayn şəkildə müraciət edərək girovsuz, banka gəlmədən 250 min manatadək kredit ala bilərlər. Sahibkar müraciət etdikdən sonrakı 3 saat ərzində qərar verilir, vəsait isə 4 saat ərzində müştərinin hesabında görünür. Bu məhsul  MDB ölkələri üzrə 2-ci yerə çıxıb”.

“KREDİT PORTFELİNİ 3 MİLYARD MANATA ÇATDIRMAĞI PLANLAŞDIRIRIQ “

Taleh Kazımov vurğulayıb ki, 2021-2023-cü illəri əhatə edən Strategiyanın həyata keçirilməsilə PAŞA Bankın korporativ kredit portfelinin 1 milyard  manat artırılması nəzərdə tutulur:

"Post pandemiya dövrü olduğunu və iqtisadiyyatın yenidən inkişaf edəcəyini nəzərə alaraq iddialı strategiyamız var. Növbəti 3 ildə PAŞA Bank korporativ kredit portfelini 2 milyard manatdan 3 milyard manata, kiçik və orta sahibkarlıq üzrə portfelini isə 2 dəfə artıraraq 350 milyon manata çatdırmağı planlaşdırır".

Həmçinin oxu

“PAŞA Bankın bazar payı 17%-ə yüksəlib”