Daşkəsən rayonunun ərazisində yerləşən “Elba” MMC-yə məxsus heyvan kəsimi, emalı fabrikində mənşəyi məlum olmayan heyvan ətləri aşkarlanıb.

Kənd Təsərrüfatı Nazirliyi yanında Dövlət Baytarlıq Nəzarəti Xidmətindən  bildiriblər ki, aprelin 26-da Daxili İşlər Nazirliyinin Daşkəsən Rayon Polis Şöbəsi əməkdaşları tərəfindən Daşkəsən-Gəncə avtomobil yolunda sürücü Əliyev Natiq Rüstəm oğlunun idarə etdiyi “Hyundai” markalı 99-KV-790 dövlət nömrə nişanlı yük avtomobilinə baxış keçirilib. Baxış zamanı avtomobilin yük yerində mənşəyinə və sağlamlığına dair heç bir sənədi olmayan 50 qutuda (hər biri 20 kq) 1000 kiloqram sümükdən ayrılmış, karton qutulara qablaşdırılmış və dondurulmuş mənşəyi məlum olmayan heyvan ətləri aşkarlanıb.

Polis əməkdaşları tərəfindən saxlanılmış avtomobilin yük yerində aşkarlanmış mənşəyi məlum olmayan heyvan ətlərinin Daşkəsən rayonu Quşçu qəsəbəsinin inzibati ərazisində yerləşən, Elçin Rüstəmovun rəhbərlik etdiyi “Elba” MMC-yə məxsus heyvan kəsimi və emalı fabrikində yükləndiyi məlum olub və müəssisəyə baxış keçirilib.

Baxış zamanı fabrikin 1 nömrəli kamerasında hər biri 20 kiloqram olmaqla 260 qutu, hər biri 40 kiloqram olmaqla 12 qutu, ümumilikdə 5680 kiloqram sümükdən ayrılmış karton qutulara qablaşdırılmış, dondurulmuş, mənşəyinə və sağlamlığına dair heç bir sənədi olmayan heyvan ətləri, həmçinin hər biri 6 kiloqram olmaqla 60 ədəd polietilen paketə qablaşdırılmış, mənşəyi bilinməyən, ümumi çəkisi 360 kiloqram olan heyvanın iç piyi, 2 baş iribuynuzlu heyvanın başı, dərisi, ayaqları aşkarlanıb. Eyni zamanda “Elba” MMC-yə məxsus 2 nömrəli soyuducu kamerada 2 baş iribuynuzlu heyvanın başı, dərisi, ayaqları və daxili orqanları aşkar olunub.

Daşkəsən Rayon Polis Şöbəsinin müraciəti əsasında Daşkəsən Rayon Baytarlıq İdarəsinin əməkdaşları sürücü Əliyev Natiq Rüstəm oğlunun idarə etdiyi “Hyundai” markalı 99-KV-790 dövlət nömrə nişanlı yük avtomobilində və Daşkəsən rayonu Quşçu qəsəbəsinin inzibati ərazisində yerləşən, Elçin Rüstəmovun rəhbərlik etdiyi “Elba” MMC-yə məxsus heyvan kəsimi və emalı fabrikində aşkarlanmış ətlərin və ət məhsullarının mənşəyini, sağlamlığını müəyyənləşdirmək məqsədilə nümunələr götürərək, müayinə üçün Respublika Baytarlıq Laboratoriyasına göndəriblər.

Aşkar edilmiş ətlər, iç piyləri, başlar, dərilər və digər orqanlar müayinələr başa çatana qədər fabrikin 1 nömrəli soyuducu kamerasına yığılaraq, qapısı möhürlənməklə müvəqqəti saxlanca qoyulub.

Bununla əlaqədar Daşkəsən Rayon Polis Şöbəsində müvafiq araşdırmalar aparılır.

Ətlərdən götürülən nümunələrin laboratoriya müayinələrinin nəticəsindən asılı olaraq qanunvericiliklə müəyyən edilmiş qaydada tədbirlər görüləcək.

Qeyd edək ki, “Elba” MMC Elba" kolbasalarının istehsalçısıdır.