Qarabağ müharibəsi bitdikdən sonra iqtisadi gücü olmayan Ermənistanda uzunmüddətli ciddi böhran başlayacaq.

Bunu iqtisadçı ekspert Eldəniz Əmirov deyib.

O qeyd edib ki, müharibənin Ermənistan büdcəsinə hazırkı təsiri çox ağır və hərtərəflidir:

“Təsəvvür edin ki, Ermənistanda büdcə öhdəliklərinin icrası qalıb bir tərəfdə, bütün ölkə müharibənin aparılmasına səfərbər edilib. Bu, sadə iş deyil. Müharibə təkcə silah-sursatla, texnika və texnoloji dəstəklə aparılmır. Müharibə hərb sənayesindən başqa digər sənaye istehsalı məhsullarına təlabatı da kəskin artırır. Qidadan yanacağa qədər, infstrukturdan kommunikasiyaya qədər bütün istiqamətlərdə xərclər çoxalır. Bu təminatı icra etmək üçün digər istiqamətlərdə büdcənin icrasında ciddi problemlər yaşanır. Ardınca sosial-iqdisadi həyat iflic olmağa başlayır. İcrası yarımçıq qalan məsələlərin həllinə edilən cəhdlər isə avtomatik olaraq büdcə kəsirini və xarici borclanma səviyyəsini artırmış olur”.

Ekspert əlavə edib ki, Ermənistanda büdcə kəsiri hələ müharibədən əvvəl ümumi daxili məhsulun 5%-ni üstələmişdi. Müharibə isə bu kəsiri daha da artıracaq. Artmaqda olan büdcə kəsirinin kompensasiyası isə xarici borclanmanın daha da artması hesabına mümkündür.

İqtisadçının sözlərinə görə, təbii resurslar baxımından Ermənistan iqtisadiyyatının əsas gəlir mənbəyi dağ-mədən sənayesi idi.

E.Əmirov bildirib ki, Ermənistan üçün sənayenin bu növünün yerləşdiyi coğrafiya Azərbaycanın işğal olunmuş ərazilərini və bizim dövlət sərhədimizə yaxın Ermənistan ərazilərini əhatə edir. Muharibə başlayandan sonra isə hər iki ərazidə hasilat dayanıb ki, bu da Ermənistanı əsas gəlir mənbəyindən məhrum edib:

“Xərclərin ifrata vardığı bir məqamda gəlir yerindən də məhrum olmaq Ermənistan iqtisadiyyatı üçün növbəti öldürücü zərbə effekti oldu. Bütün bunlar müharibə zamanı, yəni hazırda hiss edilməkdədir. Amma daha ciddi təlatüm müharibə bitdikdən sonra başlayacaq. Onsuz da borc içində batan bir dövləti müharibə daha da bataqlığın dibinə çəkəcək”.

İqtisadçı qeyd edib ki, müharibənin vurduğu hərbi zərər dərhal görünsə də, onun gətirdiyi iqtisadi təlatüm müharibə başa çatdıqdan sonra hiss edilməyə başlayır. Belə ki, müxtəlif istiqamətlərdə yaranmış maddi boşluqların doldurulması, dağılmış infrastrukturun bərpası, götürülmüş digər öhdəliklərin icrası, ortaya çıxacaq müəyyən kompensasiya öhdəlikləri və s. problemlər məhz müharibə başa çatdıqdan sonra həll tələb edir:

“Bərbad iqtisadi sistemə malik Ermənistanın isə bu problemləri həll etməyə iqtisadi güc olmayacaq. Nəticədə isə ölkədə uzunmüddətli ciddi böhran başlayacaq”.

Trend