“Akkord Sənaye Tikinti İnvestisiya Korporasiyası” ASC-nin Gürcüstanda inşa etdiyi beynəlxalq əhəmiyyətli avtomobil magistralının bir hissəsi istifadəyə verilib.

Magistralın açılış mərasimində Gürcüstanın Baş naziri Giorgi Qaxaria, dövlət və hökumət rəsmiləri, Azərbaycanın Gürcüstandakı səfirliyinin birinci katibi Sərxan İsmayılov, Akkordun Gürcüstan nümayəndəliyinin rəhbəri Məzahir Abdullayev və digər rəsmi şəxslər iştirak ediblər.

M.Abdullayev görülən işlər barədə məlumat verib.

Bildirilib ki, Akkord “Şərq-Qərb” beynəlxalq avtomobil magistralının (E-60) tərkib hissəsi olan Samtredia-Grigolote hissəsində tikinti işlərinin aparılması ilə bağlı tenderin qalibi olub.

Gürcüstanın Regional İnkişaf və İnfrastruktur Nazirliyi ilə “Akkord Sənaye Tikinti İnvestisiya Korporasiyası” ASC arasında Kutaisi-Samtredia 4 zolaqlı dairəvi avtomobil yolunun (3 km 13 + 400 - km 30 + 000) modernləşdirilməsi barədə 2018-ci il dekabrın 28-də imzalanmış müqavilə əsasında magistralın tərkib hissəsi olan Kutaisi dairəvi yolunun inşası həyata keçirilib.

Ümumi uzunluğu 17 kilometr olan yolun bu hissəsinin tikintisinə 2019-cu il martın 5-də başlanılıb. Yolun 2021-ci ilin yanvarın 3-də istifadəyə verilməsi nəzərdə tutulmuşdu. Lakin “Akkord” tikinti işlərini sürətlə və keyfiyyətlə həyata keçirərək layihə üzrə nəzərdə tutulmuş işləri 6 ay tez başa çatdırıb.

Baş nazir Giorgi Qaxaria görülən işləri yüksək qiymətləndirib, kollektivə təşəkkür edib.

Bildirib ki, Azərbaycan ilə Gürcüstan strateji tərəfdaşdırlar. Azərbaycan şirkətləri bu tərəfdaşlığın daha da möhkəmlənməsində mühüm rol oynayırlar. “Akkord” şirkətinin bu layihəni qüsursuz və vaxtından əvvəl istifadə verməsi bunun əyani sübutudur.

Səfirliyin birinci katibi Sərxan İsmayılov Azərbaycan dövlətinin Gürcüstan ilə münasibətlərin daha da möhkəmlənməsinə və inkişaf etdirilməsinə xüsusi diqqət yetirdiyini bildirib. Azərbaycan şirkətlərinin də bu istiqamətdə çalışdıqlarını diqqətə çatdırıb.

Baş nazir Azərbaycan iş adamları və şirkətlərinin Gürcüstandakı fəaliyyətini yüksək qiymətləndirib, onların xarici ölkələrdəki nailiyyətlərini Azərbaycan dövlətinin xarici siyasətinin uğuru kimi dəyərləndirib.

“Akkord Sənaye Tikinti İnvestisiya Korporasiyası” ASC-nin və digər Azərbaycan şirkətlərinin Gürcüstanda daha böyük işlər görəcəyinə və uğur qazanacaqlarına əmin olduğunu vurğulayıb.

Azərtac