“Səhliyalı” şirkəti Azərbaycanda ilk dəfə olaraq “Halal Dönər” brendini ictimaiyyətə təqdim edib.

Verilən məlumata görə, Şirkətin hazırladığı “Halal Dönər” məhsulunun əsas özəlliyi ət kəsiminin müsəlman adət-ənənələrinə uyğun həyata keçirilməsidir. Şirkətin istehlakçıların rəğbətini qazanmasının əsas səbəbi məhsulun keyfiyyətini və hazırlanma prosesini cəmiyyətə açıq şəkildə nümayiş etdirməsidir.

Məhsulun təqdimatı zamanı dönərlərin ət kəsimindən tutmuş, hazır olunub yeyilmə anınadək baş verən bütün proseslər ictimaiyyətə nümayiş etdirilib. Təqdimat zamanı çıxış edən Türkiyədən dəvət edilmiş qida mühəndisi Mükərrəm Özcan bildirib ki, şirkətin əsas hədəfi Azərbaycan xalqının rəğbətini qazanmaqdır. Onun sözlərinə görə, məhsulun ən əsas özəlliyi onun halal olması ilə bağlıdır:

“Digər bir özünəməxsusluğu isə bu gün hazırlanan dönərin 1 və ya 10 il sonra da eyni standartla və eyni keyfiyyətlə hazırlanmasıdır. Məhsul Almaniyadan gətirilən son texnologiya ilə hazırlanır. Ətlər standart - 2.5 millimetr qalınlığında açılır. Açılan ətlər ət daşıma qazanlarına qoyulur və üzərinə standart miqdarda ədviyyatlar əlavə edilir. Burada qoyulan statndartlardan kənara çıxılması mümkün deyil. Daha sonra ədviyyat əlavə edilmiş ətlər “Thumbler” adlı vakumlu, soyuduculu, masaj aparatına qoyulur. Aparatda təxminən 1.5 saat saxlanılan ədviyyatlı ətlər “Thumbler”in içərisindən çıxarılır və bloklama yerinə aparılır”.

Mühəndis onu da bildirdi ki, daha sonra həmin ətlər xüsusi yerdə paketlənir və qutulara yığılaraq -18 dərəcə olan anbara göndərilir: “Bundan sonra gələn sifarişlər əsasında “halal dönər”lər soyuducusu olan nəqliyyat vasitələri ilə istənilən ərazilərə çatdırılır. Bununla da məhsulun saxlanılması üçün nəzərdə tutulan temperatur halqası qırılmamış olur”.

Mükərrəm Özcan dönərin dondurulmasının səbəblərini də açıqlayıb. Bildirib ki, dönər ətləri -18 dərəcədə müştəriyə çatdırıldığı üçün alıcı onu kəsdiyi zaman ətin sonlarına doğru da temperatur mənfi olaraq qalır və bu da mikrobların yaranmasına imkan vermir. Nəticədə də məhsul xarab olmur: “Amma normal halda şişə taxılan dönərlərdə məhsulun saxlandığı, həmçinin bişirildiyi yer isti olduğu üçün mikrobların yaranması üçün münbit şərait olur. Belə olan halda isə məhsulun xarab olması və zəhərlənmə halları baş verir”.

Bundan başqa şirkətin bişirilmiş, hazır dönər məhsulları da alıcılara təqdim ediləcək. Belə ki, məhsullar “Səhliyalı”nın müəssisəsində bişiriləcək, insan əli dəymədən qablaşdırılacaq və -18 dərəcədə istehlakçılara çatdırılacaq. Alıcılar da onu tava, mikrodalğalı sobalarda isidib, rahatlıqla yeyə biləcəklər. Qeyd edək ki, halal qidalardan hazırlanan dönər qısa müddət ərzində şirkətin yeni açacağı dönərxana şəbəkələrində və “Səhliyalı”nın əməkdaşlıq etdiyi digər müəssisələrdə də alıcılara təqdim ediləcək.

Dünya standartlarına uyğun olaraq xüsusi reseptlə hazırlanan dönərin digərlərindən fərqi uzun müddət saxlanıla bilməsidir. Bu dönər AZS 104-2003 şərtlərinə uyğun olaraq istehsal edilir və Respublika Gigiyena və Epidemiologiya mərkəzi tərəfindən sertifiaklaşdırılıb. Dönərdə istifadə olunan dana və qoyun ətləri şirkətin mal-qara kəsim müəsisəsində HALAL üsulla kəsilən 1-ci kateqoriyalı heyvanlardan emal olunur. Artıq 21 ildir fəaliyyət göstərən şirkətin əsas hədəfi istehlakçıya dadlı və ləzzətli dönərin təqdim edilməsidir. “Səhliyalı” şirkəti istehsal etdiyi məhsulun keyfiyyətinə tam zəmanət verir və istənilən zaman arzu edən müştəriləri istehsal ilə tanış etməyə hazırdır.

© Qafqazinfo