Dünən Bakı şəhər Dövlət Yol Polisi İdarəsi avtomobillərdə azyaşlıların daşınması zamanı xüsusi oturacaqlardan (avto kreslo) istifadə edilməməsinə görə sürücülərin cərimələnəcəyini açıqladı. Həmçinin, təhlükəsizlik məqsədi ilə arxa oturacaqlarda da “avto kreslo”ların istifadə edilməli olduğu bildirildi. Bundan sonra isə sosial şəbəkələrdə vətəndaşlar “avto kreslo”ların qiymətlərindən şikayətlənməyə başladılar.

"Marja" "Qafqazinfo.az"a istinadən xəbər verir ki, bununla bağlı kiçik araşdırma aparılaraq bazarda xüsusi oturacaqların hansı qiymətə satıldığını müəyyən edilib.

Bəlli olub ki, yeni “kreslo”lar ın qiyməti 150-350 manat arası dəyişir.

Alqı-satqı saytlarında sürücülər işlənmiş oturacaqlar da təklif edirlər. Bu zaman isə qiymət “kreslo”nun vəziyyətindən asılı olaraq dəyişir. İkinci əl xüsusi oturacaqlar isə 40-100 manat qiymətə satılır.

TƏLƏBİN SƏBƏBİ MƏLUM OLDU

Bakı şəhər Dövlət Yol Polisi İdarəsinin sürücülərdən “avto kreslo” tələbinin səbəbi bəlli olub. Onsuz da qanunvericiliyin tələbi olan uşaqlar üçün ön oturacaqda xüsusi oturacaqdan istifadə etmənin xüsusi xəbərdarlıqla elan edilməsi media və sosial şəbəkələrdə müzakirələrə səbəb oldu. Əksəriyyət bunun hansısa biznes marağına görə edildiyini açıqladı.

Yeni tələblər heç də “kreslo” satışına görə deyil.

Belə ki, bir neçə gün öncə Beynəlxalq Avtomobil Federasiyasının 3 əməkdaşı Bakıya təşrif buyurub. Onlar burada bir neçə gün monitorinq aparıblar, sonda isə Dövlət Yol Polisi İdarəsinin rəhbərliyi ilə qapalı görüş keçirilib. Həmin görüşdə 2-i qadın, 1-i kişi olan nümayəndə heyəti DYP rəhbərliyinə monitorinqlərinin nəticəsi barədə məlumat verib və bu işlərin həlli üçün fkir mübadilə aparıblar. Nümayəndə heyəti son illərdə görülən müsbət işləri yüksək qiymətləndirsələr də, görüşdə ən çox tənqid olunan sürücülərin kəmərdən düzgün istifadə etməməsi və ya ümumiyyətlə, istifadə etməməsi, həmçinin maşınlarda uşaqlar üçün xüsusi oturacaqların olmaması halları göstərilib.

Bundan sonra DYP rəhbərliyi bu problemin həll üçün çox tələbkar addımlar atmaq qərarı verib. Buna görə də şəhərdə bu hallara görə güzəşt edilməyəcəyi açıqlanıb. Bildirilir ki, beynəlxalq normalara görə də, 12 yaşdan aşağı uşaqların daşınması zamanı avto kreslolardan istifadə etmək tələbi məcburidir.

© Qafqazinfo.az