NBC Bank 2017-ci ili artımlar və xalis mənfəətlə başa vurub

2015 və 2016-cı illəri zərər ilə bağlamış “NBC Bank” ASC 2017-ci ili 2 milyon 914,2 min manat xalis mənfəətlə başa vurub.

“Marja” Bankın maliyyə hesabatlarına istinadən xəbər verir ki, ötən il “NBC Bank”ın faiz gəlirləri 13 milyon 894 min manat, qeyri-faiz gəlirləri isə 3 milyon 142 min manat təşkil edib.

“NBC Bank” 2015-ci ildə 17 milyon 861 min manat faiz, 2016-cı ildə 16 milyon 208 min manat faiz, 3 milyon 264 min manat da qeyri-faiz gəliri əldə etmişdi. 2015-ci ildə 14 milyon 35 min manat qeyri-faiz zərəri yaranmışdı. Faiz gəlirlərinin 2017-ci illə müqayisədə çox olmasına baxmayaraq, Bank, 2015-ci ili 13 milyon 791 min manat, 2016-cı ili isə 1 milyon 797,5 min manat zərər ilə bağlamışdı. Bankın böyük zərərə düşməsinə devalvasiyalar səbəb olmuşdu.

XƏRCLƏRİ AZALIR

"NBC Bank" faiz və qeyri faiz xərclərini azaldıb.  Bankın 2016-cı ildə 6 milyon 920 min manat olan faiz xərcləri 2017-ci ildə 6 milyon 479 min manata, 7 milyon 27 min manat olan qeyri-faiz xərcləri isə 6 milyon 32 min manat geriləyib.

Bank 2016-cı ildə aktivlər üzrə mümkün zərərlərin ödənilməsi üçün xüsusi ehtiyatın yaradılmasına (xərclər) 7 milyon 249 min manat ayırmışdısa, 2017-ci ildə bu rəqəm 1 milyon 611 min manat təşkil edib. Xərclər və ehtiyatlara ayırmalar azaldığından Bankın cəmi xərcləri də azalıb və xalis mənfəət əldə olunub.

Ehtiyatlara ayırmaların azalması “NBC Bank”da ödənməyən kreditlərin artmasının kəskin azaldığına işarədir.

MÜŞTƏRİLƏRƏ VERİLƏN KREDİTLƏR ARTIB

31 Dekabr 2017-ci il tarixində “NBC Bank” 204 milyon 125 min manat cəmi aktivlərə, 147 milyon 285 min manat cəmi öhdəliklərə və 56 milyon 839 min manat cəmi balans kapitalına malik olub.

Bankın kredit portfeli (müştərilərə verilmiş kreditlər - məqsədli ehtiyatlar çıxılmaqla) 2016-cı ilin sonundakı 125 milyon 751 min manatdan 154 milyon 396 min manata yüksəlib. “NBC Bank”da vaxtı keçmiş kreditlər 13 milyon 354 min manatdan 12 milyon 35 min manata düşüb. Vaxtı keçmiş kreditlərin ehtiyatlar daxil kredit portfelində xüsusi çəkisi 9,90%-dən 7,36%-ə geriləyib.

“NBC Bank” 2016-cı ilin sonunda 158 milyon 970 min manat cəmi aktivlərə, 106 milyon 31 min manat cəmi öhdəliklərə və 52 milyon 939 min manat cəmi kapitala malik idi.

“NBC Bank”da depozitlər 2016-cı ilin sonundakı 67 milyon 598 min manatdan 2017-ci ilin sonunda 73 milyon 969 min manata qalxıb.

MƏCMU KAPİTALI DA ARTIB

“NBC Bank”ın məcmu kapitalı 2016-cı ilin sonundakı 52 milyon 5 min manatdan 2017-ci ilin sonunda 55 milyon 795 min manata yüksəlib.