ABŞ-da Nümayəndələr Palatası şirkətlərə və fərdi şəxslərə vergi güzəştləri nəzərdə tutan qanun layihəsini qəbul edib. 

Beləliklə, ABŞ Prezidenti Donald Trumpın qanunvericilik sahəsində ilk qələbəsini qazanmasına yalnız bir addım qalıb.

 
"Marja" xəbər verir ki, ABŞ Nümayəndələr Palatası, Respublikaçılar Partiyasının son vergi təkliflərini 203-ə qarşı 227 səslə qəbul edib.

 
Demokratların qarşı çıxdığı layihəyəyə, çox yüksək vergiyə malik əyalətləri təmsil edən 12 Respublikaçı üzv də müxalif çıxıb.
 

Nümayəndələr Palatasının sədri Paul Ryan verdiyi açıqlamada, "Bu gün, bu ölkənin insanlarına öz pullarını geri veririk" - deyib. Onun sözlərinə görə, bu qanun, 2-ci Dünya Müharibəsindən bu yana ən ağır çətinliklərlə mübarizə edən amerikalılar üçün "həqiqi bir dəstəkdir".

VERGİ GÜZƏŞTLƏRİ

 
Konqresin iki ayrı palatasında Respublikaçılar tərəfindən razılaşdırılmış yeni layihə, ABŞ şirkətlərinə mənfəət vergisinin 2018-ci ildən etibarən 35%-dən 21%-ə endirilməsini nəzərdə tutur.

 
Layihə, ölkədəki fərdi ödəyicilərə tətbiq olunan vergi dərəcələri baxımından da əhəmiyyətlidir. Beləki, fərdi gəlir vergisi dərəcələri fərqli gəlir qruplarına görə 10, 12, 22, 24, 32, 35 və 37% olmaqla 7 mərhələdə tətbiq ediləcək. Hazırda ABŞ-da mövcud fərdi gəlir vergisi fərqli gəlir qruplarına görə  10, 15, 25, 28, 33, 35 və 39,6% səviyyəsindədir.
 

Vergi qanunu layihəsini araşdıran Konqres Fiskal Birgə Komissiyasına görə, bu dəyişikliklər qarşıdakı 10 ildə federal hökumət gəlirlərini təxminən 1.5 trilyon dollar azaldacaq. Ancaq bu hesablamaya, vergi güzəştlərinin yaradacağı iqtisadi inkişafın nəticələri daxil edilməyib. Layihənin əvvəlki versiyalarının büdcə kəsirini təxminən 1 trilyon dollar artıracağı təxmin edilirdi.

ABŞ Konqresinin Büdcə Ofisinin (CBO) apardığı təhlillərdə, təklif edilən vergi güzəştlərinin federal hökumətin vergi gəlirlərini gələcək 10 ildə cəmi 1,5 trilyon azalacağını proqnozlaşdırmışdı.

İCBARİ TİBBİ SIĞORTA LƏĞV EDİLƏCƏK
 
 
Vergi layihəsində həmçinin, keçmiş Prezident Barak Obama tərəfindən icbari hala gətirilən tibbi sığortanın 2019-cu ildən etibarən yenidən istəyə bağlı olması yer alır.

 
Sözügedən təklifi dəyərləndirən CBO, icbari tibbi sığortasının ləğvi halında səhiyyə sığortası xərclərinin mövcud sistemə nisbətən 10 faiz artacağı və ölkədə sığortasız adam sayını 2027-ci ilədək 13 milyon artıracağı proqnozunu vermişdi.

 
NÖVBƏTİ "DAYANCAQ" SENATDIR

 
ABŞ Prezidenti Donald Trump və Respublikaçılar Partiyasının builki ən mühüm uğuru kimi göstərilən vergi layihəsinin növbəti "dayanacağı" Senat olacaqdır.

 
Senatda səsvermənin bu gün keçiriləcəyi açıqlanıb.

 
Senatdan da keçməsi gözlənilən layihə, son mərhələ olaraq ABŞ Prezidenti Donald Trumpın imzasına təqdim olunacaqdır.

 
Trump, vergi layihəsinin Nümayəndələr Palatasının keçməsinin ardından sosial media vasitəsilə, başda Respublikaçı liderlər olmaq üzrə layihəyə dəstək verən bütün nümayəndələrə təşəkkür edib.

ABŞ-ın Konqresi 2 palatadan ibarətdir: Senat və Nümayəndələr Palatası.

Qeyd edək ki, vergi güzəştlərinin ABŞ-da iqtisadi inkişafın sürətlənməsinə, ABŞ şirkətlərinin xaricdəki pullarını geri gətirmələrinə və nəticədə Dolların güclənməsinə səbəb olacağı bildirilir.