Səudiyyə Ərəbistanında 4 Noyabrdan bəri davam edən korrupsiya əməliyyatına paralel olaraq, İran və Livana qarşı sərt bəyanatlar və nəhayət,ötən gün Səudiyyənin vətəndaşlarını Livanı təcili tərk etməyə çağırması, Yaxın Şərqdə yeni bir qruplaşmanın da xəbərçisi ola bilər.

"Marja" xəbər verir ki, İranın İraq, Suriya və Livanda artan nüfuzuna qarşı Səudiyyə Ərəbistanının İsrail ilə bir ittifaq qura biləcəyi artıq yüksək səslə dilə gətirilməyə başlanıb.

İsraildə Baş nazir Binyamin Netanyahunun kabinetində Təhsil Nazirliyi vəzifəsini icra edən ifrat sağçı "Habayit Hayehudi" partiyasının lideri Naftali Bennett, "İsrailin 2 hədəfi var: İranın bölgədə hakim mövqeyə gəlməsini əngəlləmək və regiondakı ağlabatan oyunçularla İsrailin içində olduğu ittifaqlar qurmaq" deyib.

Bennett, çıxışında Səudiyyə Ərəbistanının adını çəkməyib. Ancaq ölkənin qəzetləri İrana qarşı bir İsrail- Səudiyyə Ərəbistanı ittifaqı ehtimalının artdığı fikirindədir. "Jerusalem Post" Qəzetində yer alan bir yazıda keçmiş Müdafiə Naziri Moshe Yaalonun "İsrail ilə Sünni Ərəb ölkələrinin İranın nüvə təhdidinə qarşı birləşə biləcəyi" istiqamətindəki iddiası xatırladılıb və "İsrail və Səudiyyə Ərəbistanı yeni müttəfiqlər ola bilər" deyilib.

 
İQTİSADİ YAXINLAŞMA

 
Bir-birini diplomatik olaraq tanımayan Səudiyyə Ərəbistanı ilə İsrail arasındakı yaxınlaşma, ABŞ Prezidenti Donald Trumpın may ayında bu iki ölkəyə etdiyi art arda ziyarətlərlə başlayıb. ABŞ Prezidenti Donald Trump, 20 Mayda səfər etdiyi Ər-Riyaddan hərəkət edərək İsrailə uçan ilk prezident oldu. İsrail Baş Naziri Benyamin Netanyahu da buna toxunaraq, "Ümid edirəm ki, bir gün İsrailin baş naziri, Təl-Əvivdən Ər-Riyada uça biləcəkdir" ifadəsini işlətmişdi. İyun ayında İngitərənin "The Times" Qəzeti, İsrail ilə Səudiyyə Ərəbistanı arasında birbaşa təyyarə reyslərinin açılmasını, o cümlədən bir sıra iqtisadi layihələri gizlincə müzakirə başladığını irəli sürmüşdü.

İSRAİLİN "MURDAR İŞİ"  
 

İsrail mətbuatı, Təl-Əvivlə ittifaq yaratmaqda məqsədin, Livanın hərbi və siyasi olaraq ən güclü qrupu olan İran dəstəkli "Hizbullah" təşkilatına qarşı əməliyyat keçirmək olduğunu da irəli sürür. "Haaretzte" qəzeti əvvəlki gün nəşr olunan Amos Harel imzalı təhlildə, "Sünni Krallıq (Səudiyyə Ərəbistanı) döyüş məkanını Suriyadan Livana köçürmək istəyir. Ərəbistan, İrana qarşı yeni bir cəbhə açır və İsraildən öz "murdar işini" görməsini istəyir"- şərhi edilib. Son aylarda Livan sərhədinə yaxın genişmiqyaslı təlimlər keçirən İsrailin "Hizbullaha" qarşı 2006-dan sonra yeni bir müharibə hazırlığı içində olduğu irəli sürülmüşdü.

 
ƏR-RİYAD  İSRAİLİN HİZBULLAHI VURMASINI İSTƏYİR

 
Livanda "Hizbullah" təşkilatının lideri Həsən Nasrallah, Livanın Baş naziri Saad Haririnin istefası və Səudiyyə Ərəbistanının təzyiqləri haqqında sərt bəyanat verib. Hariri Səudiyyə Ərəbistanının təzyiqi ilə istefa verdiyini və bu ölkədə ev həbsində tutulduğunu irəli sürən Nasrallah "Səudiyyə Livan siyasətinə daha əvvəl görülməmiş şəkildə müdaxilə edir. Livanlılara, öz fikirlərinə uyğun yeni baş nazir təlqin etməyə çalışırlar" deyə bildirib. Haririnin Səudiyyə Ərəbistandan çıxışının qadağan olduğunu irəli sürən Nasrallah, Səudiyyə rəhbərliyinin İsraili "Hizbullaha" qarşı müharibə başlamağa məcbur etdiyini də iddia edib.