"AccessBank" biznesin kreditləşməsində ticarətdən aqrar sektora keçidi müşahidə edir"

"Bank sektoru yerli biznesə dəstək baxımından olduqca vacib rola malikdir".

Bu barədə "AccessBank"ın Korporativ bankçılıq departamentinin direktoru Günay Cəlilova Azərbaycan-Almaniya biznes forumunda çıxışı zamanı bildirib.

Departament rəhbərinin sözlərinə görə, yerli və xarici maliyyə mənbələrinin mövcudluğu iqtisadiyyatın vacib sektorlarına dəstək verən banklar üçün mühüm amildir.

"Real sektorun, xüsusilə aqrar sahənin inkişafı və ixracın həcminin artırılması Azərbaycan hökuməti üçün prioritet hesab olunur. Bu sektorların stimullaşdırılması üçün ölkədə Sahibkarlara Kömək Milli Fondu (SKMF) fəaliyyət göstərir. Adıçəkilən Fond müvəkkil banklar vasitəsilə sahibkarlara güzəştli kreditlər verir. Cari ilin mart ayından etibarən biz aqrar sektorun kreditləşməsində canlanma müşahidə edirik. SKMF-nin 2016-cı il üzrə hesabatına əsasən, Fondun ayırdığı kreditlərin 80%-i aqrar sektorun payına düşüb. Öz növbəsində mikromaliyyələşdirmə bazarının 50%-nə nəzarət edən "AccessBank" biznesin kreditləşməsində ticarətdən aqrar sektora keçidi müşahidə edir", - deyə G. Cəlilova vurğulayıb.
 

Xanım bankir deyib ki, beynəlxalq maliyyə təsisatları tərəfindən ayrılan kreditlər və digər maliyyə vəsaitləri yerli müəssisələrin vacib maliyyə mənbələrindən biri hesab olunur:

"Bu xüsusda maliyyə vəsaitlərinin cəlb olunması zamanı əsas şərtlər kimi ölkədə əlverişli investisiya mühitinin mövcudluğu və müsbət iqtisadi perspektivlər götürülür. Mövcud iqtisadi vəziyyətdə isə beynəlxalq kreditorlar yerli bankların maliyyələşdirilməsi zamanı bir qədər mühafizəkar yanaşma nümayiş etdirir. Buna baxmayaraq, stabil məzənnə və ÜDM-in mərhələli şəkildə artması müsbət tendensiyadan xəbər verir".

Bank rəsmisi əlavə edib ki, iqtisadi göstəricilərdə müşahidə olunan müsbət tendensiya, monetar stabillik, inflyasiyanın geriləməsi yaxın vaxtlarda maliyyə axınını stimullaşdıracaq.

"İxracın stimullaşdırılması ilə yanaşı manatın devalvasiyası turizmin inkişafına müsbət təsir edir. Bildiyimiz kimi, hökumət turizm sektorunun inkişafını prioritet elan edib. Bu baxımdan banklar bu sektorun maliyyələşdirilməsi üçün imkanlara malik olmalıdırlar", - deyə o qeyd edib.

G. Cəlilova əlavə edib ki, milli valyutanın devalvasiyaya uğraması idxalçılara neqativ təsir edib: "Şirkətlərin xərcləri artıb, bu isə qiymət artımına səbəb olub. Bu neqativ təsiri yumşaltmaq üçün idxalın əvəzlənməsi və analoji sahədə fəaliyyət göstərən yerli müəssisələrin yaradılması olduqca vacibdir. Bu isə yerli istehsalçılara, xüsusilə kiçik sahibkarlara kifayət qədər güclü maliyyə dəstəyinin verilməsini zəruri edir".

© APA