İkinci Azərbaycan Beynəlxalq İnvestisiya Forumunun təşkili, stendlərin hazırlanması, hotel otaqlarının icarəsi və investisiya layihələrinin təqdimatı ilə bağlı ümumilikdə 5 milyon 304 min 187,97 manatlıq satınalma müqavilələri bağlanıb.

Marja.az dövlət satınalmalarının vahid internet portalında açıqlanan məlumatlara istinadən xəbər verir ki, müqavilələrin hamısı bir mənbədən satınalma metodu ilə rəsmiləşdirilib.

Ən böyük müqavilə İqtisadiyyat Nazirliyinin Tikinti-Təchizat Birliyi MMC tərəfindən “CASPIAN EVENT ORGANISERS” MMC ilə bağlanıb. Müqavilənin predmeti “İkinci Azərbaycan Beynəlxalq İnvestisiya Forumunun təşkili üçün müxtəlif xidmətlər”dir. Bu müqavilənin dəyəri 3 milyon 982,37 manat təşkil edir. Satınalma 1 oktyabr 2026-cı ildə dərc edilib, müqavilənin icra müddəti 28 sentyabr – 31 dekabr 2026-cı il tarixlərini əhatə edir.

Hər gün yeni vakansiyalar - AzVak.az-da

Forumun stendlərinə 1,43 milyon manat

İqtisadiyyat Nazirliyinin Tikinti-Təchizat Birliyi MMC forum çərçivəsində stendlərin hazırlanması və quraşdırılması üçün “AZINTEREXPO” MMC ilə də müqavilə bağlayıb. “İkinci Azərbaycan Beynəlxalq İnvestisiya Forumu”nda stendin hazırlanması və quraşdırılması xidmətləri üzrə müqavilənin məbləği 1 milyon 425 min 954,48 manatdır. Bu satınalma da bir mənbədən metodu ilə həyata keçirilib. Müqavilənin başlanma tarixi 29 sentyabr, bitmə tarixi isə 31 dekabr 2026-cı il göstərilib.

Hotel otaqlarının icarəsinə 517 min manat

Azərbaycan Respublikasının İxracın və İnvestisiyaların Təşviqi Agentliyi – AZPROMO isə forum çərçivəsində mehmanxana otaqlarının icarəsi üçün “YELKEN OPERATING COMPANY” MMC ilə 517 min 252 manatlıq müqavilə bağlayıb.

Satınalmanın predmeti “İkinci Azərbaycan Beynəlxalq İnvestisiya Forumu çərçivəsində mehmanxana otaqlarının icarəsi xidmətinin satın alınması”dır.

İnvestisiya layihələrinin təqdimatına 360 min manata yaxın vəsait

AZPROMO-nun digər müqaviləsi “YENİ ABŞERON OTELİ” MMC ilə bağlanıb. “İnvestisiya layihələrinin təqdimatı üzrə tədbirin təşkili xidmətinin satın alınması” haqqında müqavilənin məbləği 359 min 999,12 manatdır. 

Beləliklə, açıqlanan dörd müqavilənin ümumi dəyəri 5 milyon 304 min 187,97 manat təşkil edir. Bunun təxminən 56,6%-i forumun təşkili üzrə müxtəlif xidmətlərə, 26,9%-i stendlərin hazırlanması və quraşdırılmasına, qalan hissəsi isə hotel otaqlarının icarəsi və investisiya layihələrinin təqdimatı ilə bağlı tədbirin təşkilinə yönəlib.

Hər gün yeni vakansiyalar - AzVak.az-da