Ermənistanın Baş naziri Nikol Paşinyan Ermənistanla Azərbaycan arasında münaqişə səhifəsinin bağlandığını və sülhün bərqərar olduğunu bildirib.

Paşinyan bunu 2025-ci il avqustun 8-də Vaşinqtonda keçirilmiş üçtərəfli görüşün ildönümü münasibətilə Ermənistan xalqına müraciətində deyib.

Paşinyan bildirib ki, bir il əvvəl ABŞ Prezidenti Donald Trampın təşəbbüsü və iştirakı ilə Ağ Evdə Ermənistan və Azərbaycan liderləri arasında keçirilən üçtərəfli görüşün nəticəsində iki ölkə arasında sülh bərqərar olub.

Onun sözlərinə görə, Ermənistan tərəfi artıq 8 avqust görüşünü “Sülh Sammiti”, Azərbaycan Prezidenti İlham Əliyevlə birlikdə qəbul etdikləri və Donald Trampın şahid qismində imzaladığı birgə bəyannaməni isə “Sülh Bəyannaməsi” adlandırır.

“Ermənistan və Azərbaycan arasında bərqərar olmuş sülh hər kəs üçün görünən və hiss ediləndir”, – Paşinyan bildirib.

Baş nazir qeyd edib ki, bununla belə, sülh gündəliyinin həyata keçirilməsində son nöqtəyə hələ çatılmayıb. O xatırladıb ki, 2025-ci il avqustun 8-də Vaşinqtonda Ermənistan və Azərbaycan xarici işlər nazirləri tərəfindən paraflanmış “Ermənistan və Azərbaycan arasında sülhün və dövlətlərarası münasibətlərin təsis edilməsi haqqında Saziş” hələ imzalanmalı və ratifikasiya olunmalıdır. Paşinyan, həmçinin Ermənistan-Azərbaycan sərhədinin delimitasiyasının davam etdirilməli olduğunu bildirib.

“Ermənistanla Azərbaycan arasında münaqişə səhifəsi bağlanıb, sülh bərqərar olub. O, gözünüzün qarşısındadır, həyatınızın və gündəlik həyatın bir hissəsinə çevrilib”, – Baş nazir əlavə edib.

O, Ermənistan-Azərbaycan sülhünün bərqərar olmasına verdiyi töhfəyə görə ABŞ Prezidenti Donald Trampa təşəkkür edib.

“Ermənistan xalqını 8 avqust münasibətilə təbrik edirəm. Azərbaycan xalqını 8 avqust münasibətilə təbrik edirəm”, – Paşinyan müraciətini yekunlaşdırıb.

Ermənistanın Baş naziri: Yaxın vaxtlarda TRIPP layihəsinin praktiki icrasına başlayacağıq

Ermənistanın Baş naziri Nikol Paşinyan TRIPP layihəsini Vaşinqton görüşünün ən mühüm nəticələrindən biri kimi qiymətləndirib.

Paşinyan bunu 2025-ci il avqustun 8-də Vaşinqtonda keçirilmiş üçtərəfli görüşün ildönümü münasibətilə Ermənistan xalqına müraciətində deyib.

O bildirib ki, “Beynəlxalq Sülh və Rifah naminə Tramp Marşrutu” (TRIPP) yaxın gələcəkdə Ermənistanın blokadasına son qoymaqla yanaşı, ölkənin və regionun iqtisadiyyatının əsas istiqamətlərindən birinə çevriləcək.

“Bu layihə Ermənistan və Azərbaycana bir-birini maneə kimi deyil, yol və qonşu kimi qəbul etməyə kömək edəcək. Yaxın vaxtlarda TRIPP layihəsinin praktiki icrasına başlayacağıq və bu, böyük regional və beynəlxalq hadisə olacaq”, – Paşinyan vurğulayıb.

İş elanları AzVak.az-da

© APA