2026-cı ilin birinci yarısında Azərbaycan dövlət büdcəsinin əsaslı xərcləri 4 milyard 188 milyon 200 min manat təşkil edib.

Marja.az Azərbaycan Respublikası Maliyyə Nazirliyinin 2026-cı ilin birinci yarısına dair hesabatına istinadən xəbər verir ki, bu vəsaitin 1 milyard 64 milyon 100 min manatı “Böyük Qayıdış” proqramına, 810 milyon 200 min manatı dövlət investisiya proqramına yönəldilib.

Digər əsaslı xərclər isə 2 milyard 313 milyon 900 min manat təşkil edib.

Beləliklə, ümumi əsaslı xərclərin 55,2 faizi digər əsaslı xərclərin, 25,4 faizi “Böyük Qayıdış” proqramının, 19,3 faizi isə dövlət investisiya proqramının payına düşüb.

“Böyük Qayıdış” proqramının icrası 30,4 faiz olub

2026-cı il üzrə “Böyük Qayıdış” proqramına 3 milyard 500 milyon manat ayrılıb. Birinci yarımildə həmin vəsaitin 1 milyard 64 milyon 100 min manatından istifadə edilib.

Proqram üzrə ümumi icra göstəricisi 30,4 faiz təşkil edib. İlin ikinci yarısına 2 milyard 435 milyon 900 min manat və ya ayrılmış vəsaitin 69,6 faizi qalıb.

“Böyük Qayıdış” proqramı çərçivəsində altı istiqamət üzrə ümumilikdə 340 layihənin icrası nəzərdə tutulub.

Ən çox vəsait nəqliyyat layihələrinə xərclənib

“Böyük Qayıdış” proqramı üzrə 76 nəqliyyat layihəsinə 1 milyard 49 milyon 400 min manat ayrılıb. Birinci yarımildə bu vəsaitin 505 milyon 200 min manatı istifadə olunub.

Nəqliyyat istiqaməti üzrə icra səviyyəsi 48 faiz təşkil etməklə proqram daxilində ən yüksək göstərici olub. Nəqliyyat layihələrinə yönəldilmiş vəsait “Böyük Qayıdış” proqramı üzrə ümumi istifadənin təxminən 47,5 faizini formalaşdırıb.

Sosial layihələrə 400 milyon manatdan çox yönəldilib

Proqramda ən böyük illik vəsait sosial istiqamətə ayrılıb. Bu sahədə 182 layihə üçün nəzərdə tutulmuş 1 milyard 707 milyon 900 min manatın 400 milyon 500 min manatı istifadə olunub.

Sosial layihələr üzrə icra göstəricisi 23 faiz təşkil edib. Məbləğ baxımından sosial istiqamət nəqliyyatdan sonra ikinci yerdə qərarlaşıb.

Müdafiə və hüquq-mühafizə sahəsində 19 layihəyə ayrılmış 143 milyon 800 min manatın 60 milyon 300 min manatı istifadə olunub. İcra səviyyəsi 42 faiz olub.

“Sair” kateqoriyasına daxil edilən 16 layihə üçün nəzərdə tutulmuş 243 milyon 700 min manatın 75 milyon 200 min manatı xərclənib. Bu istiqamətdə icra göstəricisi 31 faiz təşkil edib.

Su təsərrüfatı layihələrində icra cəmi 3 faizdir

“Böyük Qayıdış” proqramında ən aşağı icra göstəricisi su təsərrüfatı və meliorasiya sahəsində qeydə alınıb.

Bu istiqamətdə 36 layihəyə 221 milyon 300 min manat ayrılsa da, birinci yarımildə cəmi 7 milyon 600 min manat istifadə olunub. İcra səviyyəsi 3 faiz təşkil edib.

Energetika və sənaye sahəsində 11 layihə üçün ayrılmış 133 milyon 900 min manatın 15 milyon 400 min manatı istifadə olunub. Bu istiqamətdə icra göstəricisi 11 faiz olub.

İnvestisiya proqramının da 30 faizi icra edilib

2026-cı il üzrə dövlət investisiya proqramına 2 milyard 700 milyon manat ayrılıb. Birinci yarımildə həmin vəsaitin 810 milyon 200 min manatından istifadə olunub.

Proqramın ümumi icra səviyyəsi 30 faiz təşkil edib. İlin ikinci yarısına 1 milyard 889 milyon 800 min manat və ya illik vəsaitin 70 faizi qalıb.

Dövlət investisiya proqramında altı istiqamət üzrə ümumilikdə 287 layihə göstərilib.

Nəqliyyat sahəsində 42 layihəyə ayrılmış 1 milyard 10 milyon 900 min manatın 337 milyon 800 min manatı istifadə olunub. İcra göstəricisi 33 faiz təşkil edib.

Su təsərrüfatı və meliorasiya sahəsində 88 layihəyə nəzərdə tutulmuş 568 milyon 700 min manatın 151 milyon 200 min manatı xərclənib. İcra səviyyəsi 27 faiz olub.

Sosial istiqamətdə 63 layihəyə ayrılmış 255 milyon 100 min manatın 51 milyon 200 min manatı istifadə edilib. Bu sahədə proqramın icrası 20 faiz təşkil edib.

Energetika və sənaye sahəsi 18 faizlə ən aşağı icra göstəricisinə malik olub. Sahə üzrə 11 layihəyə ayrılmış 211 milyon 500 min manatın 37 milyon 900 min manatı istifadə edilib.

Müdafiə və hüquq-mühafizə sahəsində icra 34 faiz, “sair” layihələr üzrə isə 36 faiz təşkil edib. Bu istiqamətlərə müvafiq olaraq 60 milyon 900 min manat və 171 milyon 200 min manat yönəldilib.

İkinci yarımildə xərcləmə tempi 2 dəfədən çox artmalıdır

İllik ayrılmış vəsaitin göstərildiyi “Böyük Qayıdış” və dövlət investisiya proqramlarına birlikdə 6 milyard 200 milyon manat nəzərdə tutulub. Birinci yarımildə bu məbləğin 1 milyard 874 milyon 300 min manatı və ya 30,2 faizi istifadə olunub.

Hər iki proqram üzrə ilin ikinci yarısına 4 milyard 325 milyon 700 min manat qalıb. İllik vəsaitin tam istifadə olunması üçün iyul–dekabr aylarında orta aylıq xərclər təxminən 721 milyon manata çatmalıdır.

Birinci yarımildə iki proqram üzrə ayda orta hesabla 312 milyon manat istifadə edildiyi nəzərə alınarsa, ikinci yarımildə xərcləmə tempi təxminən 2,3 dəfə yüksəlməlidir.

Əsaslı xərclərin ilin ikinci yarısında sürətlənməsi satınalma proseslərinin başa çatması, tikinti işlərinin genişlənməsi və görülmüş işlər üzrə ödənişlərin rəsmiləşdirilməsi ilə bağlı ola bilər. Bununla belə, xüsusilə “Böyük Qayıdış” proqramının su təsərrüfatı və energetika istiqamətlərində aşağı icra səviyyəsi ilin qalan dövründə ciddi sürətlənmə tələb olunduğunu göstərir.

Hesabatda, həmçinin xarici kreditlər hesabına investisiya məqsədləri üçün 99 milyon 200 min manat vəsaitdən istifadə edildiyi qeyd olunub.

İş elanları AzVak.az-da