“AccessBank” QSC 2026-cı ilin birinci yarısını 28 milyon 97 min manat xalis mənfəətlə başa vurub. Bank ötən ilin eyni dövründə 20 milyon 940 min manat xalis mənfəət əldə etmişdi. Beləliklə, “AccessBank” QSC-nin xalis mənfəəti 7 milyon 157 min manat və ya 34,2 faiz artıb.

Marja.az “AccessBank” QSC-nin 30 iyun 2026-cı il tarixinə maliyyə hesabatlarına istinadən xəbər verir ki, Bankın aktivləri 1 milyard 785 milyon 111 min manata, balans kapitalı isə 261 milyon 371 min manata çatıb.

Hesabat dövründə kredit portfeli genişlənsə də, depozitlərin azalması və maliyyə institutlarından cəlb olunan vəsaitlərin artması Bankın maliyyələşmə strukturunda nəzərəçarpan dəyişiklik yaradıb.

Mənfəət 28 milyon manatı keçib – əsas gəlir xətti güclənib

2026-cı ilin yanvar-iyun aylarında “AccessBank” QSC-nin faiz gəlirləri 141 milyon 290 min manat təşkil edib. Ötən ilin eyni dövründə Bankın faiz gəlirləri 121 milyon 337 min manat olmuşdu. Faiz gəlirləri bir il ərzində 19 milyon 953 min manat və ya 16,4 faiz artıb.

Artımın əsas hissəsi müştərilərə verilmiş kreditlərdən əldə olunan gəlirlərin hesabına formalaşıb. “AccessBank” QSC kreditlər üzrə 134 milyon 574 min manat faiz gəliri əldə edib. Bu göstərici ötən ilin eyni dövrü ilə müqayisədə 18 milyon 963 min manat və ya 16,4 faiz çoxdur.

Banklar və digər maliyyə institutlarına verilmiş kreditlər üzrə faiz gəlirləri 534 min manat və ya 21,2 faiz artaraq 3 milyon 51 min manata yüksəlib.

Digər banklarda yerləşdirilən depozitlərdən əldə olunan faiz gəlirləri isə 964 min manatdan 2 milyon 140 min manata çatıb. Bu istiqamətdə gəlirlər 1 milyon 176 min manat və ya 2,2 dəfə artıb.

Bunun əksinə olaraq, ticarət və investisiya qiymətli kağızlarından əldə olunan faiz gəlirləri 720 min manat və ya 32,1 faiz azalaraq 1 milyon 525 min manata düşüb.

Faiz xərcləri gəlirlərdən daha sürətli böyüywb

“AccessBank” QSC-nin faiz xərcləri 2026-cı ilin ilk yarısında 56 milyon 352 min manat təşkil edib. Ötən ilin eyni dövründə bu göstərici 47 milyon 343 min manat idi. Bankın faiz xərcləri 9 milyon 9 min manat və ya 19 faiz artıb. Beləliklə, faiz xərclərinin artım tempi faiz gəlirlərində qeydə alınmış 16,4 faizlik yüksəlişi üstələyib.

Depozitlər üzrə faiz xərcləri 6 milyon 650 min manat və ya 18,6 faiz artaraq 42 milyon 490 min manata çatıb.

“AccessBank” QSC-nin cəlb edilmiş kreditlərə görə ödədiyi faizlər isə 2 milyon 193 min manat və ya 19,9 faiz artaraq 13 milyon 228 min manat olub.

Mərkəzi Bank və dövlət fondları qarşısındakı öhdəliklər üzrə faiz xərcləri 175 min manat və ya 38,1 faiz artaraq 634 min manata yüksəlib.

Buna baxmayaraq, Bankın xalis faiz gəlirləri 10 milyon 944 min manat və ya 14,8 faiz artaraq 84 milyon 938 min manata çatıb.

“AccessBank” QSC-nin əsas gəlir mənbəyi olan kredit faizlərində ikirəqəmli artım Bankın gəlir yaratmaq qabiliyyətinin gücləndiyini göstərir. Xalis faiz gəlirlərinin təxminən 15 faiz yüksəlməsi də əsas bank fəaliyyətinin müsbət dinamika nümayiş etdirdiyini təsdiqləyir. Bununla belə, faiz xərclərinin gəlirlərdən daha sürətli artması maliyyələşmə resurslarının bahalaşdığını göstərir. Bu tendensiya davam edərsə, kredit gəlirlərindəki artımın bir hissəsi daha yüksək depozit və borclanma xərcləri tərəfindən mənimsənilə bilər.

Komissiya gəlirləri artıb

“AccessBank” QSC-nin qeyri-faiz gəlirləri 2026-cı ilin ilk yarısında 8 milyon 558 min manat təşkil edib. Ötən ilin eyni dövründə bu göstərici 8 milyon 37 min manat olmuşdu. Qeyri-faiz gəlirləri 521 min manat və ya 6,5 faiz artıb.

Bankın haqq və komissiya gəlirləri 403 min manat və ya 4,9 faiz artaraq 8 milyon 709 min manata yüksəlib.

“AccessBank” QSC xarici valyuta əməliyyatları və məzənnə dəyişiklikləri üzrə 374 min manat zərər açıqlayıb. Ötən ilin eyni dövründə valyuta əməliyyatları üzrə zərər 522 min manat idi. Beləliklə, valyuta zərəri 148 min manat və ya 28,4 faiz azalıb.

Digər gəlirlər isə 30 min manat və ya 11,9 faiz azalaraq 223 min manata düşüb.

“AccessBank” QSC-nin qeyri-faiz gəlirlərindəki artım əsasən komissiya gəlirləri və valyuta zərərinin azalması hesabına baş verib. Komissiya gəlirlərinin artması müsbət olsa da, bu gəlir xəttinin 4,9 faizlik yüksəlişi faiz gəlirlərindəki artımdan xeyli aşağıdır. Bu da Bankın ümumi gəlirlərində kredit fəaliyyətinin dominant mövqeyini qoruduğunu göstərir.

Əməkhaqqı xərcləri 4,4 milyon manat artıb

“AccessBank” QSC-nin qeyri-faiz xərcləri 2026-cı ilin ilk yarısında 52 milyon 175 min manat təşkil edib. Ötən ilin eyni dövründə bu xərclər 47 milyon 792 min manat idi. Qeyri-faiz xərcləri 4 milyon 383 min manat və ya 9,2 faiz artıb.

Ən böyük artım əməkhaqqı və digər kompensasiya xərclərində qeydə alınıb. Bu xərclər 4 milyon 356 min manat və ya 17,6 faiz artaraq 29 milyon 87 min manata çatıb.

Ümumi və inzibati xərclər 1 milyon 107 min manat və ya 9,6 faiz artaraq 12 milyon 591 min manat olub.

“AccessBank” QSC-nin amortizasiya xərcləri isə 971 min manat və ya 23,5 faiz azalaraq 3 milyon 165 min manata düşüb. Digər xərclər 109 min manat və ya 1,5 faiz azalaraq 7 milyon 332 min manat təşkil edib.

Bankın xalis faiz və qeyri-faiz gəlirlərinin cəmi 93 milyon 496 min manat olub. Ötən ilin eyni dövründə bu göstərici 82 milyon 31 min manat idi.

Qeyri-faiz xərcləri və ehtiyatlar çıxılmadan əvvəl əməliyyat mənfəəti 41 milyon 321 min manat təşkil edib. Bu göstərici illik müqayisədə 7 milyon 82 min manat və ya 20,7 faiz artıb.

Sadələşdirilmiş hesablamaya əsasən, “AccessBank” QSC-nin qeyri-faiz xərclərinin əməliyyat gəlirlərinə nisbəti 58,3 faizdən 55,8 faizə düşüb.

Əməkhaqqı xərclərindəki 17,6 faizlik artım “AccessBank” QSC-nin xərclər bazası üzərində əsas təzyiq mənbəyi olub. Bununla belə, gəlirlər xərclərdən daha sürətli artdığı üçün Bankın əməliyyat səmərəliliyi yaxşılaşıb. Xərc-gəlir nisbətinin təxminən 2,5 faiz bəndi azalması göstərir ki, Bank artan əməliyyat xərclərinə baxmayaraq, əldə etdiyi gəlirlərin daha böyük hissəsini mənfəətə çevirə bilib.

Ehtiyat xərcləri azalıb

“AccessBank” QSC mümkün zərərlərin ödənilməsi üçün 2026-cı ilin ilk yarısında 6 milyon 200 min manat ehtiyat xərci tanıyıb. Ötən ilin eyni dövründə bu xərc 8 milyon 131 min manat təşkil etmişdi. Ehtiyat xərcləri 1 milyon 931 min manat və ya 23,8 faiz azalıb. Nəticədə “AccessBank” QSC-nin mənfəət vergisindən əvvəlki mənfəəti 9 milyon 13 min manat və ya 34,5 faiz artaraq 35 milyon 121 min manata çatıb.

Bankın mənfəət vergisi xərci 1 milyon 856 min manat və ya 35,9 faiz artaraq 7 milyon 24 min manat olub. Vergi ödənildikdən sonra “AccessBank” QSC-nin xalis mənfəəti 28 milyon 97 min manat təşkil edib. Ötən ilin eyni dövrü ilə müqayisədə xalis mənfəət 7 milyon 157 min manat və ya 34,2 faiz artıb.

“AccessBank” QSC 2026-cı ilin ilk yarısında həm əsas bank gəlirlərini, həm də əməliyyat mənfəətini nəzərəçarpacaq dərəcədə artırıb. Xalis faiz gəlirlərinin 14,8 faiz, ehtiyatlardan əvvəlki əməliyyat mənfəətinin 20,7 faiz yüksəlməsi mənfəət artımının yalnız ehtiyat xərclərinin azalması hesabına baş vermədiyini göstərir. Bununla belə, ehtiyat xərclərinin 23,8 faiz azalması xalis mənfəətdəki 34,2 faizlik artıma əlavə dəstək verib. Bank üçün əsas risk faiz xərclərinin faiz gəlirlərindən daha sürətli yüksəlməsidir.

Kredit portfeli 47 milyon manat böyüyüb

30 iyun 2026-cı il tarixinə “AccessBank” QSC-nin cəmi aktivləri 1 milyard 785 milyon 111 min manat təşkil edib. 2025-ci ilin sonunda Bankın aktivləri 1 milyard 770 milyon 369 min manat idi. Altı ay ərzində aktivlər 14 milyon 742 min manat və ya cəmi 0,8 faiz artıb.

Aktivlərin ümumi həcmi cüzi artsa da, onların daxili strukturunda ciddi dəyişikliklər baş verib. “AccessBank” QSC-nin müştərilərə verdiyi ümumi kreditlərin məbləği 47 milyon 188 min manat və ya 3,5 faiz artaraq 1 milyard 381 milyon 387 min manata çatıb.

Ehtiyatlar çıxıldıqdan sonra xalis kredit portfeli 42 milyon 654 min manat və ya 3,3 faiz artaraq 1 milyard 318 milyon 291 min manat olub.

Kreditlərin Bankın aktivlərində payı yüksəlib. Xalis kredit portfelinin aktivlərə nisbəti 2025-ci ilin sonundakı 72,1 faizdən 73,9 faizə çatıb.

Banklar və digər maliyyə institutlarında yerləşdirilmiş depozitlər 69 milyon 895 min manat və ya 29,9 faiz azalaraq 164 milyon 199 min manata düşüb.

Ticarət və investisiya qiymətli kağızlarının məbləği də 7 milyon 928 min manat və ya 18,5 faiz azalaraq 34 milyon 864 min manata enib.

“AccessBank” QSC-nin digər aktivləri 3 milyon 483 min manat və ya 11,2 faiz artaraq 34 milyon 606 min manata yüksəlib.

“AccessBank” QSC-nin aktivləri ümumilikdə cüzi artsa da, Bank digər maliyyə institutlarında yerləşdirdiyi vəsaitlərin bir hissəsini nağd pula və kredit portfelinə yönəldib. Digər banklardakı depozitlərin təxminən 70 milyon manat azalması fonunda nağd vəsaitlərin 45,8 milyon manat, xalis kreditlərin isə 42,7 milyon manat artması aktivlərin strukturunda məqsədli yenidən bölgünün baş verdiyini göstərir.

İstehlak kreditləri sürətlənib, biznes portfeli 1 milyard manatı keçib 

“AccessBank” QSC-nin biznes kreditləri 30 iyun 2026-cı il tarixinə 1 milyard 42 milyon 140 min manat təşkil edib. Biznes kreditləri 2025-ci ilin sonu ilə müqayisədə 19 milyon 270 min manat və ya 1,9 faiz artıb.

Bankın istehlak kreditləri isə daha yüksək templə böyüyüb. Bu kreditlərin həcmi 22 milyon 278 min manat və ya 7,7 faiz artaraq 311 milyon 447 min manata çatıb.

Daşınmaz əmlak kreditləri 5 milyon 640 min manat və ya 25,5 faiz artaraq 27 milyon 800 min manat olub.

Kredit portfelinin 75,4 faizi biznes, 22,6 faizi istehlak, 2 faizi isə daşınmaz əmlak kreditlərindən ibarət olub.

Biznes kreditləri ümumi portfeldə əsas mövqeyini qorusa da, onların payı 76,7 faizdən 75,4 faizə düşüb. İstehlak və daşınmaz əmlak kreditlərinin payı isə artıb.

Ehtiyatlar daha sürətli artıb

“AccessBank” QSC-nin müştərilərə verilmiş kreditlər üzrə yaratdığı məqsədli ehtiyatların məbləği 63 milyon 96 min manata çatıb. 2025-ci ilin sonunda bu göstərici 58 milyon 562 min manat idi. Yığılmış kredit ehtiyatları 4 milyon 534 min manat və ya 7,7 faiz artıb.

Kredit portfeli 3,5 faiz böyüdüyü halda, ehtiyatların 7,7 faiz artması nəticəsində ehtiyatların ümumi kreditlərə nisbəti 4,4 faizdən 4,6 faizə yüksəlib.

“AccessBank” QSC-nin yığılmış kredit ehtiyatlarını portfeldən daha sürətli artırması kredit risklərinə qarşı buferin gücləndirildiyini göstərir. Lakin mənfəət və zərər hesabatında cari dövr üzrə ehtiyat xərclərinin azalması ilə balansda yığılmış ehtiyatların artması ziddiyyət təşkil etmir. Birinci göstərici altı ay ərzində tanınmış xərc axınını, ikinci göstərici isə hesabat tarixində formalaşmış ümumi ehtiyat qalığını əks etdirir.

“AccessBank” QSC-nin aktivləri cəmi 0,8 faiz artsa da, Bank kredit portfelini 47,2 milyon manat genişləndirib. Artımın əsas hissəsi istehlak və biznes kreditləri hesabına formalaşıb. Digər banklardakı depozitlərin və qiymətli kağızların azalması isə Bankın resurslarının daha böyük hissəsini kreditləşməyə yönəltdiyini göstərir.

Depozitlər 48 milyon manat azalıb

30 iyun 2026-cı il tarixinə “AccessBank” QSC-nin cəmi öhdəlikləri 1 milyard 523 milyon 740 min manat təşkil edib. 2025-ci ilin sonunda Bankın öhdəlikləri 1 milyard 537 milyon 658 min manat idi. Altı ay ərzində öhdəliklər 13 milyon 918 min manat və ya 0,9 faiz azalıb.

Öhdəliklərin azalmasının əsas səbəbi depozit portfelinin kiçilməsi olub. “AccessBank” QSC-nin depozitləri 47 milyon 753 min manat və ya 4,2 faiz azalaraq 1 milyard 84 milyon 628 min manata düşüb. Fiziki şəxslərin depozitləri demək olar dəyişməyib. Bu vəsaitlər 826 min manat və ya 0,1 faiz artaraq 894 milyon 13 min manata çatıb. Əsas azalma hüquqi şəxslərin depozitlərində qeydə alınıb. “AccessBank” QSC-də hüquqi şəxslərin yerləşdirdiyi vəsaitlər 48 milyon 579 min manat və ya 20,3 faiz azalaraq 190 milyon 615 min manata düşüb.

Nəticədə fiziki şəxslərin ümumi depozit portfelində payı 78,9 faizdən 82,4 faizə yüksəlib. Hüquqi şəxslərin payı isə 21,1 faizdən 17,6 faizə geriləyib.

Fiziki şəxslərin depozitlərinin sabit qalması “AccessBank” QSC-nin pərakəndə maliyyələşmə bazasını qoruduğunu göstərir. Lakin hüquqi şəxslərin depozitlərindəki 20,3 faizlik azalma Bankın ümumi depozit portfelini aşağı çəkib. Nəticədə maliyyələşmə bazasında fiziki şəxslərin çəkisi daha da yüksəlib.

Maliyyə institutlarından borclanma artıb

“AccessBank” QSC-nin kredit təşkilatları və digər maliyyə institutları qarşısındakı öhdəlikləri 26 milyon 73 min manat və ya 7,8 faiz artaraq 361 milyon 511 min manata çatıb. Subordinasiya borc öhdəlikləri dəyişməyərək 17 milyon manat səviyyəsində qalıb.

Bankın digər öhdəlikləri isə 7 milyon 762 min manat və ya 14,7 faiz artaraq 60 milyon 601 min manata yüksəlib.

Müştəri kreditlərinin depozitlərə nisbəti də yüksəlib. “AccessBank” QSC-nin ümumi kreditlərinin depozitlərə nisbəti 2025-ci ilin sonundakı 117,8 faizdən 127,4 faizə çatıb.

Xalis kreditlərin depozitlərə nisbəti isə 112,7 faizdən 121,5 faizə yüksəlib.

“AccessBank” QSC kredit portfelini böyütdüyü halda depozitləri azalıb. Bank yaranmış fərqin bir hissəsini digər kredit təşkilatları və maliyyə institutlarından cəlb edilən vəsaitlər hesabına maliyyələşdirib. Kreditlərin depozitləri daha böyük həcmdə üstələməsi Bankın təkcə müştəri depozitlərindən deyil, institusional maliyyələşmə mənbələrindən də əhəmiyyətli dərəcədə istifadə etdiyini göstərir. Bu dəyişiklik kreditləşmənin davam etdirilməsi üçün resurs yaratsa da, borclanma mənbələrinin qiyməti və müddəti Bankın gələcək faiz xərcləri baxımından mühüm əhəmiyyət daşıyacaq.

“AccessBank” QSC-nin ümumi öhdəlikləri azalsa da, maliyyələşmə strukturunda ciddi dəyişiklik baş verib. Hüquqi şəxslərin depozitlərinin 48,6 milyon manat azalması digər maliyyə institutlarından cəlb olunan vəsaitlərin 26,1 milyon manat artması ilə qismən kompensasiya edilib. Bu səbəbdən depozitlərin maliyyələşmədəki çəkisi azalıb, institusional borclanmanın rolu isə artıb.

Kapital 29 milyon manata yaxın artıbı

30 iyun 2026-cı il tarixinə “AccessBank” QSC-nin balans kapitalı 261 milyon 371 min manat təşkil edib. 2025-ci ilin sonunda Bankın kapitalı 232 milyon 711 min manat idi. Altı ay ərzində balans kapitalı 28 milyon 660 min manat və ya 12,3 faiz artıb. “AccessBank” QSC-nin səhmdar kapitalı dəyişməyərək 121 milyon 750 min manat səviyyəsində qalıb.

Bölüşdürülməmiş mənfəət isə 97 milyon 153 min manatdan 125 milyon 250 min manata yüksəlib. Artım 28 milyon 97 min manat və ya 28,9 faiz təşkil edib və cari dövrdə əldə olunan xalis mənfəətə bərabər olub.

Ümumi ehtiyatlar 563 min manat və ya 4,1 faiz artaraq 14 milyon 371 min manata çatıb.

Kapitalın aktivlərdəki payı 2025-ci ilin sonundakı 13,1 faizdən 14,6 faizə yüksəlib.

“AccessBank” QSC-nin prudensial kapital hesabatına əsasən, tutulmalardan əvvəl I dərəcəli kapitalı 218 milyon 903 min manat təşkil edib. Qeyri-maddi aktivlər üzrə 15 milyon 737 min manat tutulduqdan sonra Bankın I dərəcəli kapitalı 203 milyon 166 min manat olub.

“AccessBank” QSC-nin II dərəcəli kapitalı 59 milyon 468 min manat təşkil edib. Bu məbləğə cari ilin 28 milyon 97 min manat mənfəəti, 14 milyon 372 min manat ümumi ehtiyat və 17 milyon manat subordinasiya borcu daxil edilib.

Tutulmalardan sonrakı məcmu prudensial kapital 262 milyon 634 min manat, risk dərəcəsi üzrə ölçülmüş yekun aktivlər isə 1 milyard 473 milyon 979 min manat olub.

Təqdim edilən göstəricilər əsasında “AccessBank” QSC-nin I dərəcəli kapital adekvatlığı əmsalı təxminən 13,78 faiz, məcmu kapital adekvatlığı əmsalı isə 17,82 faiz təşkil edib.

“AccessBank” QSC-nin kapital artımı əlavə səhmdar qoyuluşu hesabına deyil, əldə edilən mənfəətin Bankda saxlanılması nəticəsində baş verib. Bu, Bankın daxili mənfəət yaratmaq hesabına kapital bazasını genişləndirdiyini göstərir. Balans kapitalının aktivlərdən daha sürətli böyüməsi də kapitalın balansdakı çəkisini artırıb. Risk çəkili aktivlərin 1 milyard 474 milyon manata yaxın olması isə Bankın kapital göstəricilərinin qorunması üçün davamlı mənfəət yaratmasının vacibliyini göstərir.

“AccessBank” QSC 2026-cı ilin ilk yarısında qazandığı mənfəəti kapitalda saxlayaraq balans mövqeyini gücləndirib. Səhmdar kapitalı dəyişməsə də, bölüşdürülməmiş mənfəətin 28 milyon manatdan çox artması balans kapitalını 261 milyon manatdan yuxarı qaldırıb. Prudensial kapitalın 262 milyon 634 min manat təşkil etməsi Bankın geniş kredit portfeli və risk çəkili aktivləri üçün mühüm maliyyə buferi formalaşdırır.

YEKUN

“AccessBank” QSC 2026-cı ilin ilk yarısında gəlirlilik baxımından güclü nəticə nümayiş etdirib. Bankın xalis mənfəəti 34,2 faiz artaraq 28 milyon 97 min manata, xalis faiz gəlirləri isə 14,8 faiz artaraq 84 milyon 938 min manata çatıb. Əməliyyat gəlirlərinin xərclərdən daha sürətli böyüməsi xərc-gəlir nisbətini yaxşılaşdırıb. Ehtiyat xərclərinin azalması da yekun mənfəətə əlavə dəstək verib.

Kredit portfelinin 47 milyon manatdan çox artması “AccessBank” QSC-nin kreditləşmədə fəallığını qoruduğunu göstərir. Xüsusilə istehlak və daşınmaz əmlak kreditlərində artım tempi ümumi portfel artımını üstələyib.

Hesabatın əsas zəif tərəfi depozit portfelinin 47 milyon 753 min manat azalmasıdır. Azalma demək olar ki, tam şəkildə hüquqi şəxslərin depozitlərindəki 48 milyon 579 min manatlıq geriləmədən qaynaqlanıb.

Depozitlərin azalması və kreditlərin artması kreditlərin depozitlərə nisbətini 127,4 faizə yüksəldib. Eyni zamanda Bankın digər maliyyə institutları qarşısındakı öhdəlikləri 26 milyon manatdan çox artıb.

Ümumilikdə, “AccessBank” QSC-nin hesabatı mənfəət, əməliyyat səmərəliliyi, kreditləşmə və kapital baxımından müsbət nəticələr ortaya qoyur. Bununla yanaşı, hüquqi şəxslərin depozitlərinin azalması, institusional borclanmanın artması və faiz xərclərinin gəlirlərdən daha sürətli böyüməsi növbəti dövrlərdə diqqətdə saxlanmalı əsas məsələlərdir.

İş elanları AzVak.az-da