1995-ci il 11 iyul tarixində Ümummilli Lider Heydər Əliyevin iştirakı ilə əsası qoyulan “Azər-Türk Bank” ASC-nin fəaliyyətə başlamasının 31-ci ildönümüdür.

Azərbaycanın müstəqillik tarixində yeni iqtisadi islahatların həyata keçirildiyi və ictimai-siyasi sabitliyin bərqərar olduğu bir dövrdə təsis edilən Azər Türk Bank ötən 31 il ərzində ölkənin bank-maliyyə sektorunun inkişafına mühüm töhfələr verərək etibarlı maliyyə institutlarından birinə çevrilib.

Bu gün Bank rəqəmsal transformasiya strategiyasına uyğun olaraq müasir texnologiyaların tətbiqi, innovativ filial konsepsiyasının inkişafı, təmassız ödəniş həllərinin genişləndirilməsi, rəqəmsal bankçılıq xidmətlərinin təkmilləşdirilməsi və müştəriyönümlü yanaşmanın gücləndirilməsi istiqamətində ardıcıl fəaliyyət göstərir. Həyata keçirilən islahatlar nəticəsində müştərilərə təqdim olunan xidmətlərin keyfiyyəti beynəlxalq standartlara uyğun səviyyəyə yüksəldilib.

Fəaliyyətə başlamasının 31-ci ildönümü münasibətilə “Azər-Türk Bank” ASC-nin rəhbər heyətinin və struktur bölmələrinin rəhbərlərinin iştirakı ilə geniş tərkibli iclas keçirilib.

İclasda çıxış edən “Azər-Türk Bank” ASC-nin İdarə Heyətinin sədri Günel Nəbiyeva Dövlət Bankının ötən dövr ərzində əldə etdiyi nəticələrdən, həyata keçirilən institusional islahatlardan, rəqəmsallaşma və dayanıqlı inkişaf istiqamətində görülən işlərdən bəhs edib. O bildirib ki, Bankın əsas prioriteti müştəri məmnuniyyətinin artırılması, innovativ maliyyə xidmətlərinin inkişafı, korporativ idarəetmənin daha da təkmilləşdirilməsi və ölkənin iqtisadi inkişafına töhfə verməkdir.

Daha sonra İdarə Heyətinin digər üzvləri də Bankın fəaliyyətinin müxtəlif istiqamətləri üzrə təqdimatlarla çıxış edərək 2026-cı ilin ilk yarımilliyinin maliyyə nəticələri, həyata keçirilən layihələr və qarşıda duran əsas hədəflər barədə məlumat veriblər.

İclas çərçivəsində “Azər-Türk Bank” ASC-nin 2026–2028-ci illəri əhatə edən Strateji İnkişaf Planı təqdim olunub. Sənəddə Bankın əsas rolunun biznes müştəriləri üçün uzunmüddətli və etibarlı strateji tərəfdaş kimi mövqeyinin möhkəmləndirilməsi, korporativ və KOB seqmenti müştərilərinin maliyyə xidmətlərinə çıxış imkanlarını genişləndirərək, ölkə iqtisadiyyatının strateji sahələrinin və real sektorun – istehsalın, ixracın, və innovasiyaların maliyyələşdirilməsi istiqamətində müasir maliyyə həlləri vasitəsilə ölkənin dayanıqlı iqtisadi inkişafına töhfə verilməsi təyin olunub. Bununla yanaşı, rəqəmsal transformasiyanın sürətləndirilməsi, dayanıqlı inkişaf prinsiplərinin tətbiqi, korporativ idarəetmənin təkmilləşdirilməsi, insan kapitalının inkişafı və müştəri təcrübəsinin daha da yaxşılaşdırılması  əsas strateji prioritetlər kimi müəyyən edilib.

İclasda Dövlət Bankının davamlı inkişafı və bazardakı mövqeyinin daha da gücləndirilməsi istiqamətində həyata keçiriləcək tədbirlər haqqında da məlumat verilib.

İş elanları AzVak.az-da