Cənubi Qafqazın ən böyük metallurgiya müəssisəsi olan “Baku Steel Company” QSC (bundan sonra – BSC) 2-4 iyun 2025-ci il tarixlərində Bakı Enerji Həftəsi çərçivəsində təşkil olunan 30-cu Yubiley Bakı Enerji Forumu və Beynəlxalq Xəzər Neft və Qaz Sərgisində iştirak edir. 

Bu il Bakı Enerji Həftəsinə 39 ölkədən 267 şirkət toplanıb. Mötəbər tədbirə Azərbaycanla yanaşı, Almaniya, Amerika Birləşmiş Ştatları, Avstriya, Belarus, Belçika, Birləşmiş Ərəb Əmirlikləri, Böyük Britaniya və Şimali İrlandiya, Bolqarıstan, Çexiya, Çin, Estoniya, Finlandiya, Fransa, Gürcüstan, Hindistan, İsrail, İsveçrə, İtaliya, Qazaxıstan, Qvineya-Bisau, Lüksemburq, Macarıstan, Misir, Monako, Niderland, Norveç, Özbəkistan, Pakistan, Polşa, Rumıniya, Rusiya, Sinqapur, Səudiyyə Ərəbistanı, Slovakiya, Sloveniya, Türkiyə, Ukrayna, Yaponiya kimi ölkələr qatılıblar. 

02 iyun 2025-ci il tarixində Azərbaycan Respublikasının Prezidenti cənab İlham Əliyev 30-cu Beynəlxalq Xəzər Neft və Qaz Sərgisinin rəsmi açılış mərasiminə qatılaraq, çıxış edib və sərgi ilə tanış olub.

Beynəlxalq Xəzər Neft və Qaz Sərgisinin daimi iştirakçılarından biri olan və bu il də tədbirin gümüş sponsoru qismində iştirak edən  BSC, Bakı Ekspo Mərkəzinin 1-ci zalında 1C322 ünvanlı stendində öz yüksək keyfiyyətli, API və digər beynəlxalq sertifikatlara malik, məhsullarını sərgiləyir. Tədbirin ziyarətçiləri və iştirakçıları arasında böyük marağa səbəb olan stenddə BSC-nin geniş çeşiddə polad məhsulları, xüsusilə neft-qaz istismarı layihələrində istifadə olunan tikişsiz boruları, həmçinin ferrosilisium məhsulu nümayiş olunur. 

Qeyd edək ki, bu gün Bakı Enerji Həftəsinin 30-cu yubileyi münasibətilə Bakı Ekspo Mərkəzinin həyətyanı ərazisində keçirilən ağacəkmə aksiyasında Beynəlxalq Xəzər Neft və Qaz Sərgisinin iştirakçıları ilə yanaşı BSC-nin nümayəndələri də fəal iştirak ediblər.

Bakı Ekspo Mərkəzindəki stendimiz qabaqcıl metallurgiya həlləri ilə maraqlanan sənaye mütəxəssisləri və tərəfdaşlar üçün açıqdır.

Sərgidən şəkillər: