Alternativ enerji istehsalçıları istifadə etmədikləri elektrik enerjisini “Azərişıq” Açıq Səhmdar Cəmiyyəti şəbəkəsinə ötürərək, sata və ya şəbəkə enerjisi ilə əvəzləşdirə biləcəklər. Bu prosesə aktiv istehlakçıların (elektrik enerjisi istehlak etməklə yanaşı, bərpa olunan enerji mənbələri hesabına elektrik enerjisi istehsal edən şəxslər) “Azərişıq” ASC tərəfindən qeydiyyata alınması ilə başlanılıb.

Mütəxəssislər bildirirlər ki, dəstək mexanizminin tətbiqi həyət evi, villa və bağ sahiblərini alternativ enerji mənbələrindən istifadəyə stimullaşdırmaqla bərabər, alternativ enerji sistemləri quraşdırılmış daşınmaz əmlakın qiymətini də artıracaq.

“Helind” alternativ enerji sistemləri şirkətnin icraçı direktoru Orxan Quluzadə bildirib ki, gündüz evdə olmamaqları və ya az olmaqları səbəbindən həyət evi, bağ evi sahiblərinin günəş panellərindən əldə etdikləri enerji itkiyə gedirdi.

“Bu da onların alternativ enerjiyə marağını azaldırdı. Dəstək mexanizminin tətbiqi ilə ev sahibi evdə olmadıqda (ya da sahibkarın obyektində sərfiyyat olmadıqda) paneldən əldə edilən enerji şəbəkəyə ötürüləcək. Evdə (obyektdə) olduqda və ya sərfiyyatı artdıqda isə ötürdüyü enerjini ödənişsiz geri alacaq”- alternativ enerji sistemləri üzrə mütəxəssis belə deyib.

Orxan Quluzadənin sözlərinə görə, əvvəllər alternativ enerjidən istifadəyə daha çox şəbəkə enerjisinin çatmadığı yerlərdə yaşayanlar üstünlük verirdisə, dəstək mexanizminin tətbiqi ilə, əksinə, şəbəkəyə yaxın olanlar da bərpa edilən enerji mənbəyi quraşdırmağa çalışacaqlar. Özlərinə daşınmaz əmlak alanların, tikdirib, təmir edənlərin bərpa edilən enerji mənbəyi quraşdırması əmlakın dəyərini artıran amillərdən olacaq.

“Təsəvvür edin ki, yaşamadığınız bağ evinizdə sizin elektrik sayğacınızı “geri çevirən”, ildən-ilə dəyişən elektrik enerjisini pulsuz almağınıza imkan verən bir yatırım etmisiniz”- “Helind” şirkətinin rəhbəri vurğulayıb.

Qeyd edək ki, aktiv istehlakçıların dəstəklənməsi mexanizmi Nazirlər Kabinetinin təsdiqlədiyi qaydalara əsasən tətbiq olunur. Dəstək mexanizmindən daşınan əmlakında (evində müəssisəsində, obyektində) bərpa olunan enerji mənbələri hesabına gücü 150 kVt-a qədər (150 kVt da daxil olmaqla) elektrik enerjisi istehsal edən fiziki və ya hüquqi şəxslər faydalanacaqlar. Dövlətin alternativ enerji istehsalçılarına dəstək mexanizmindən faydalanmaq istəyənlər linkdə qeyd edilmiş sənədlərlə ASAN kommunalda qeydiyyatdan keçməlidirlər https://asan.gov.az/service/asan-kommunal/azerisiq-asc-terefinden-goesterilen-xidmetler/aktiv-istehlakcinin-qeydiyyata-alinmasi