"Gold Alko" MMC bildirir ki, Şirkətin guya alkoqollu içkiləri keyfiyyət standartlarına uyğun olmayan şəkildə istehsal etməsi, satması və həmin məhsulları saxta aksiz markaları ilə markalaması barədə yayılmış xəbər həqiqətə uyğun deyil. 

Şirkətin Direktoru Mirdaməd Mahmudovun adında Marja.az-a daxil olmuş açıqlamada bildirilir ki, heç bir rəsmi sənəd və sübut olmadan bu cür əsassız xəbərlər uzun illər istehsalat sektorunda olan müəssisənin nüfuzuna xələl gətirə bilər:

"Baş Prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin 200.1 (istehlakçıları aldatma və ya pis keyfiyyətli məhsul istehsal etmə və satma), 205-1 (saxta aksiz markalarının dövriyyəsi), 213-1 (aksiz markası ilə markalanmalı olan malları belə marka olmadan satma, satış məqsədilə saxlama, istehsal binasının hüdudlarından kənara çıxarma) və 308.1-ci (vəzifə səlahiyyətlərində sui-istifadə) maddələri ilə cinayət işinin başladığı barədə məlumat yalnış və əsası olmayan məlumatdır. 

Ortaya atılan yalan ittihamlar Baş Prokuror yanında Korrupsiyaya qarşı Mübarizə Baş İdarəsinin 27 dekabr 2023-cü il tarixində "Gold Alko" MMC-nin istehsalat sahəsində və mal anbarlarında apardığı geniş operativ tədbirləri nəticəsində heç bir təsdiqini tapmamışdır. Malların keyfiyyət standartlarına uyğun olmaması tam səhv məlumatdır, bunu hər ay AQTA laboratoriyasında istehsal etdiyimiz spirtli içkilərin analizlərinin cavabları ilə sübut edə bilərik. Həmçinin müəssisə beynəlxalq İSO 22000-2022 sertifikatın malikdir".

28 dekabr 2023-cü il tarixində Baş Prokurorluğun yaydığı məlumata görə, Korrupsiyaya qarşı Mübarizə Baş İdarəsi və İqtisadiyyat Nazirliyi yanında Dövlət Vergi Xidməti tərəfindən birgə əməliyyat-axtarış tədbirlərı keçirilib.

Qeyd edilib ki, əldə olunan sübutlara əsasən “Göygöl Şərab 2”, “Agsu-1”, “Gold Alko” və “Quseynoff vodka” məhdud məsuliyyətli cəmiyyətlərinin vəzifəli şəxslərinin vəzifə səlahiyyətlərindən sui-istifadə edərək 2023-cü ilin noyabr-dekabr ayları ərzində yerli alkoqollu içkiləri keyfiyyət standartlarına uyğun olmayan şəkildə istehsal edib satmalarına, həmin məhsulları saxta aksiz markaları ilə markalamalarına və qanunsuz olaraq dövriyyəsini həyata keçirmələrinə əsaslı şübhələr müəyyən edilmişdir.

Qeyd edilən faktlarla bağlı Baş prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin 200.1 (istehlakçıları aldatma və ya pis keyfiyyətli məhsul istehsal etmə və satma), 205-1 (saxta aksiz markalarının dövriyyəsi), 213-1 (aksiz markası ilə markalanmalı olan malları belə marka olmadan satma, satış məqsədilə saxlama, istehsal binasının hüdudlarından kənara çıxarma) və 308.1-ci (vəzifə səlahiyyətlərində sui-istifadə) maddələri ilə cinayət işi başlanmışdır.

İş üzrə Respublikanın ayrı-ayrı regionlarında yerləşən müxtəlif topdan və pərakəndə satış obyektlərində aparılmış axtarışlarla sözügedən müəssisələrə məxsus külli miqdarlarda keyfiyyətsiz spirtli içki məhsulları və saxta aksiz markaları aşkarlanaraq maddi sübut qismində götürülmüşdür. Hazırda cinayət işi üzrə təqsirli şəxslərin tam dairəsinin müəyyən olunması istiqamətində tədbirlər davam etdirilir.

Həmçinin oxu

"Ağsu-1" MMC: "Saxta aksizli və keyfiyyətsiz malların olması iddiaları təsdiqini tapmayıb və cinayət işi açılmayıb"