Mehmet Şimşək Türkiyənin maliyyə naziri təyin olunduqdan sonra bazarlar diqqətini Türkiyə Cümhuriyyəti Mərkəzi Bankına (TCMB) yönəldib.

Marja xəbər verir ki, ötən gün Ankarada Şimşəklə görüşən Hafize Qaye Erkanın Mərkəz Bankın sədri vəzifəsinə təyin olunan ilk qadın olacağı gözlənilir. ABŞ-da "Möhtəşəm Türk Qızı" kimi tanınan Hafize Qaye Erkan gözlənildiyi kimi təyin olunarsa, onun ilk imtahanı iyunun 22-də olacaq. İyunun 22-də Pul Siyasəti Komitəsinin iclasında 8,5% olan siyasət faizinin eyni qalıb-qalmayacağı bazarda ən böyük sualdır.

1982-ci il təvəllüdlü Hafize Gaye Erkan İstanbul Erkek Liseyini bitirdikdən sonra Boğaziçi Universitetinin Sənaye mühəndisliyi fakültəsini bitirib. Princeton Universitetində qəbul olunduqdan sonra xaricə köçüb. O, Princeton-da iki illik doktorantura proqramını bir ildə bitirən ilk tələbə olub. Bununla da Erkan, ölkənin “ən gənc maliyyə professoru” adını qazanıb. Daha sonra Harvard Biznes Məktəbində idarəetmə elmləri və Stenford Universitetində liderlik üzrə daha iki təlim proqramını bitiriib.

SÜRƏTLİ YÜKSƏLİŞ

2005-ci ildə Goldman Sachs-da karyerasına başlayan Erkan, təxminən 9 ildən sonra First Republic Bank-da menecer kimi fəaliyyətə başlayıb. O, 2014-cü ildə baş vitse-prezident vəzifəsini icra edib. Erkan, Bankın İnvestisiya Departamentinin rəhbəri və Risklərin İdarə Edilməsi üzrə həmsədr vəzifələrində çalışıb. O, bankın aktivlərinin 10 dəfəyə qədər artmasında rol oynayıb. Gaye Erkan vəzifəyə gələndə bankın aktivləri 25-30 milyard dollar civarında idisə, 2021-ci ilin dekabrına qədər 250 milyard dollara yaxınlaşıb. 2021-ci ildə 7 ay birgə baş direktor vəzifəsində çalışdıqdan sonra 2021-ci ilin dekabrında Bankdan ayrılıb. Daha sonra Marsh McLennan-da Direktorlar Şurasına təyin edilib. Erkan həmçinin ABŞ-da yerləşən zərgərlik şirkəti olan Tiffany & Co.-da iki il idarə heyətinin üzvü olub.

Hafize Gaye Erkan ABŞ-dakı uğurlu iş həyatına görə "Möhtəşəm Türk Qızı" kimi tanınıb. San Francisco Business Times-ın 2018-ci ildə apardığı araşdırmaya görə, Amerikanın 100 ən böyük bankında prezident və ya Baş direktor titulu daşıyan 40 yaşdan kiçik yeganə qadın seçilib, Kreyn New York Business-in "Yaşı 40-dan aşağı olan 40 nəfər" siyahısına daxil olub.

Hafize Gaye Erkanın Ankaraya gəldiyi və Prezident Rəcəb Tayyib Ərdoğan ilə görüşəcəyi bildirilir.

Mərkəzi Bankın sədri vəzifəsi üçün Gaye Erkanın adı biznes, siyasət və maliyyə dairələrində çox danışılır. 

Bu gün Dollar/Türk Lirəsi məzənnəsi 7,3% artaraq 23,19 lirəyə yüksəlib.