Bu gün Türkiyədə Prezident və 28-ci dövr parlament seçkiləridir.

Marja xəbər verir ki, Türkiyə vətəndaşları ölkənin 13-cü Prezidentini seçmək üçün səs verəcəklər.

Prezident olmaq uğrunda Ədalət və İnkişaf Partiyasının (AK Parti) sədri, "Cümhur İttifaqı"nın namizədi Rəcəb Tayyip Ərdoğan, Cümhuriyyət Xalq Partiyasının sədri, "Millət İttifaqı"nın nazmizədi Kamal Klıçdaroğlu və "Ata İttifaqı"nın namizədi Sinan Oğan mübarizə aparırlar.

Ölkədə səsvermə 08:00-17:00 saatları müddətində mümkün olacaq. 

"Məmləkət" Partiyasının sədri Məhərrəm İncə Prezidentliyə namizədliyini geri götürsə də, onun adı seçki bülletenlərində yer alır. Lakin ona verilən səslərin etibarlı və ya etibarsız sayılacağı qeyri-müəyyəndir, bununla bağlı Türkiyə qanunvericiliyində konkret maddə yoxdur. 

Türkiyədə ölkə Prezidenti seçilmək üçün 50 faiz + 1 səs lazımdır.

Seçkidə prezidentliyə namizədlərdən heç biri mütləq səs çoxluğu əldə edə bilməsə, mayın 28-də səsvermənin ikinci turu keçiriləcək.

Qeyd etdiyimiz kimi, Türkiyədə Prezident seçilmək üçün 50 faizdən çox 1 səs lazımdır. Bu etibarlı səslər əsasında hesablanır. Yəni bu hesablama bütün seçicilər və ya seçkidə iştirak edənlər üzərində aparılmır. Məsələn, 2018-ci il prezident seçkilərində 51 milyon 197 min 959 nəfər səs verib. Lakin bu səslərin 50 milyon 68 min 627-si etibarlı hesab edilib. Yəni 1 milyondan çox səs etibarsız sayılıb. Namizədlərin səsləri də etibarlı səslər əsasında hesablanıb. Seçkilərin cüzi fərqlə nəticələnəcəyi təqdirdə etibarsız sayılmayan səslərin təsirinin böyük olacağı qiymətləndirilir. Çünki namizədlikdən geri çəkilən namizədə verilən səslər xaricdə və ya ölkə daxilində etibarlı sayılarsa, etibarlı səs payı artır və digər namizədlər daha aşağı faizlə seçkini tamamlayırlar. Göstərilən səslər tamamilə etibarsız sayılarsa, bu digər namizədlər üçün müsbət vəziyyətdir, onlar daha yüksək faizlə seçkini tamamlayırlar.