Çərşənbə günü açıqlanan statistik rəqəmlərə əsasən ABŞ-da 30 illik ipoteka kreditləri üzrə orta faiz dərəcəsi keçən həftə 6.71% olub ki, bu da 2022-ci ilin noyabrından bəri qeydə alınan ən yüksək göstəricidir.

Təchizat İdarəetmə İnstitutu (ISM) Sənaye Sektorunda Biznes Aktivliyi İndeksi fevral ayında 47.7 bənd ilə bazar gözləntilərinin altında qaldı və istehsal sənayesində ardıcıl dördüncü ayda daralmaya işarə etdi. “S&P Global”-ın İstehsal Sənayesi Satınalma Menecerləri İndeksi (PMI) məlumatları da 47.8 bənddən 47.3 bəndə düşüb.

Digər tərəfdən, ABŞ-ın 10 illik dövlət istiqrazlarının gəlirlilik faizi 2022-ci ilin noyabrından bəri ilk dəfə 4%-dən yuxarı qalxıb.

FED-in növbəti toplantısı yaxınlaşdıqca Amerikada monetar siyasətin gələcəyinə dair ehtimallara köklənən investorlar FED rəsmilərinin açıqlamalarını diqqət mərkəzində saxlayırlar.

Minneapolis FED sədri Nil Kaşkari, FED-in növbəti iclasında faiz dərəcələrini 25 və ya 50 baza bəndi artırılmasının gərəkliliyi  mövzusunda "açıq fikirli" olduğunu, pul-kredit siyasətini az sərtləşdirmə riskinin həddindən artıq sərtləşdirmə riskindən daha böyük olduğunu müdafiə edib.

Kaşkari bildirib ki, faiz dərəcələri keçən ilin dekabrında kafi olacağını düşündüyü 5.4% səviyyəsindən də yuxarı qaldırıla bilər.

Atlanta FED sədri Rafael Bostiç də Bankın uçot faiz dərəcəsinin 5% - 5.25% aralığında qala biləcəyinə dair mövqeyi dəyişməyib. O, həmçinin monetar siyasətin 2024-cü ilə qədər sərt qalması lazım olduğunu bildirib.

Dolların bahalaşması fonunda ucuzlaşan EUR/USD və GBP/USD məzənnələrində tendensiyanın necə davam edəcəyinə bu gün Bakı vaxtı ilə saat 14:00-da Avrozonada açıqlanacaq İstehlak Qiymətləri İndeksi (inflyasiya göstəricisi) və 16:30-da dərc olunacaq Avropa Mərkəzi Bankının son toplantısının protokolları ciddi təsir edə bilər.

Cari ticarət həftəsinə artımlarla başlayan qızıl 1841$ həddində müqavimətlə qarşılaşaraq ucuzlaşmağa başlayıb. Təhlillərə əsasən dollar indeksindəki yüksəliş davam edər və qiymətli metalın bir unisya üzrə dəyəri 1831$ həddinin altına düşərsə, 1822$ və 1813$-a kimi ucuzlaşa bilər.

Təhlil “İnvest-AZ İnvestisiya Şirkəti” QSC-nin Analitika Departamenti tərəfindən hazırlanıb.