Azərbaycan Respublikası Daxili İşlər Nazirliyinin məlumatlarına əsasən, 2022-ci il ərzində ölkədə 36494 cinayət hadisəsi qeydə alınmışdır ki, bu da 2021-ci ilin göstəricisindən 17,2 faiz çoxdur. 

Marja.az Dövlət Statistika komitəsinə istinadən xəbər verir ki,ötən il əhalinin hər 100 min nəfərinə 361 cinayət hadisəsi düşmüş, onların da 59,6 faizini az ağır, 23,8 faizini böyük ictimai təhlükə törətməyən, 16,6 faizini isə ağır və xüsusilə ağır cinayətlər təşkil etmişdir. 

Cinayətlərin strukturunda 15142 hadisə ictimai təhlükəsizlik və ictimai qayda əleyhinə olan, 14500 hadisə iqtisadi sahədə, 5388 hadisə şəxsiyyət əleyhinə, 1443 hadisə dövlət hakimiyyəti əleyhinə olan (onlardan 487 hadisə korrupsiya cinayətləri və qulluq mənafeyi əleyhinə olan digər cinayətlər), 21-i isə digər cinayətlərdir.

2022-ci ildə əvvəlki illə müqayisədə terror xarakterli cinayətlər 2,5 dəfə, əmək mühafizəsi qaydalarını pozma 2,0 dəfə, qanunsuz sahibkarlıq 1,9 dəfə, mənzil toxunulmazlığını pozma 20,0 faiz, odlu silahı, döyüş sursatını, partlayıcı maddələri və qurğuları talama və ya hədə-qorxu ilə tələb etmə, eləcə də evlənmək məqsədilə adam oğurluğu cinayətləri – hər biri 16,7 faiz, vergiləri, işsizlikdən sığorta, icbari tibbi sığorta və ya məcburi dövlət sosial sığorta haqlarını ödəməkdən yayınma 13,8 faiz, qaçaqmalçılıq cinayətləri 4,7 faiz azalmış, cinayət yolu ilə əldə edilmiş pul vəsaitlərini və ya digər əmlakı leqallaşdırma 17,4 dəfə, yetkinlik yaşına çatmayanı cinayətkar fəaliyyətə cəlb etmə 1,9 dəfə, ekoloji cinayətlər 1,8 dəfə, soyğunçuluq 34,0 faiz, kibercinayətlər 28,6 faiz, oğurluq 25,6 faiz, narkotik vasitələrin və psixotrop maddələrin qanunsuz dövriyyəsi ilə əlaqədar cinayətlər, eləcə də dələduzluq cinayətləri – hər biri 24,4 faiz, xuliqanlıq 20,8 faiz, mənimsəmə və ya israf etmə 19,6 faiz, Azərbaycan Respublikasının dövlət sərhədini qanunsuz olaraq keçmə 13,9 faiz, rüşvət cinayətləri 5,5 faiz, quldurluq cinayətləri isə 3,0 faiz artmışdır.

Hesabat dövründə 24432 nəfər cinayət törətmiş şəxs müəyyən edilmiş, 19069 nəfər isə cinayət məsuliyyətinə cəlb olunmuşdur. Cinayət məsuliyyətinə cəlb olunmuşların 63,4 faizi əmək qabiliyyətli yaşda olub heç bir yerdə oxumayan və işləməyənlər, 25,5 faizi əvvəllər də cinayət törətmiş şəxslərdir.