"Aqrar İnnovasiya və Təchizat Şirkəti” ASC 2022-ci ili 1 milyon 428 min manat xalis mənfəət ilə başa vurub.

Marja.az Şirkətin audit olunmamış hesabatına istinadən xəbər verir ki, "Aqrar İnnovasiya və Təchizat Şirkəti”nin xalis mənfəəti 2021-ci illə müqayisədə 2022-ci ildə 1 milyon 22 min manat və ya 41,7% azalıb. Şirkət 2021-ci ili 2 milyon 450 min manat xalis mənfəət ilə bağlamışdı. 2020-ci ildə isə "Aqrar İnnovasiya və Təchizat Şirkəti”nin xalis mənfəəti 3 milyon 439 min manat olmuşdu.

Satışdan gəlirlər 2021-ci ildə 44 milyon 490 min manat ikən, 2022-ci ildə 34 milyon 366 min manata düşüb.

31 Dekabr 2022-ci il tarixində "Aqrar İnnovasiya və Təchizat Şirkəti” ASC  23 milyon 610 min manat cəmi aktivlərə malik olub. Şirkət 2021-ci ilin sonunda 21 milyon 447 min manat cəmi aktivlərə malik idi. 

Azərbaycanın gübrə və kənd təsərrüfatı texnikalarının satışını həyata keçirən "Aqrar İnnovasiya və Təchizat Şirkəti" (AISCO) 2019-cu ildən fəaliyyətə başlayıb. Fermerlər üçün müxtəlif növ toxum çeşidlərinin, gübrələrin və bitki qoruma vasitələrinin bütün ölkə üzrə pərakəndə satışını həyata keçirən Gubre.az ticarət şəbəkəsi “Aqrar İnnovasiya və Təchizat Şirkəti” QSC-yə məxsusdur.

Hazırda “Aqrar İnnovasiya və Təchizat Şirkəti” ASC-nin nizamnamə kapitalı 100 min manatdır. Şirkətin rəhbəri Tofiq Niftəliyevdir.  “Aqrar İnnovasiya və Təchizat Şirkəti”nin nizamnamə kapitalının 100%-i Məcidova Afaq Hüseyn qızına məxsusdur.

Xəbər verdiyimiz kimi, 20 fevral 2023-cü il tarixində Bakı Fond Birjasının (BFB) Listinq Komitəsinin qərarı ilə “Aqrar İnnovasiya və Təchizat Şirkəti” ASC-nin 100 min manat məbləğində yeni səhmləri standart bazar seqmentində listinqə daxil edilib. Adi adlı sənədsiz səhmlərin sayı 1000 ədəd, hər birinin nominal dəyəri 100 manatdır. 23 fevral 2023-cü il tarixində qeyd olunan səhmlərin yerləşdirilməsi Bakı Fond Birjasında abunə yazılışı üsulu ilə həyata keçiriləcəkdir.  Yerləşdirmə üzrə anderrayter “CPM İnvestisiya Şirkəti” ASC-dir.