Yay mövsümü  ilə bağlı insanların kondisionerlərə olan tələbatı təbii olaraq artıb.  Artıq hər evdə, o cümlədən iş yerlərində kondisioner görmək mümkündür. Lakin eyni zamanda kondisionerlərin ziyanı barədə söz-söhbətlər də bir o qədər çoxalıb.

Maraqlıdır, hazırda kondisioner bazarında vəziyyət necədir? İstehlakçılar  kondisioner alan zaman nələrə diqqət etməlidir?

Azad İstehlakçılar Birliyinin sədri Eyyub Hüseynov açıqlamasında bildirib ki, hazırda bu sahədə ciddi problemlər var:

“Hələ qış aylarından etibarən kondisionerlərlə bağlı məhkəmə işlərimiz gedir. Bu sahədə istehlakçıların aldadılması baş verir. Əlbəttə, satıcılar bütün hallarda alıcıları aldadırlar. Adətən kondisionerin normal soyudub-isitməsi ilə bağlı yanlış məlumatlar verilir. Məsələn, kondisionerlərin sənədlərində “60 kvadrat metrlik evi soyuda bilər”  yazılır. İstehlakçının evi 40 kvadrat metrdirsə, fikirləşir ki, bu kondisioner mənim evimi normal soyudacaq. Lakin satıcı qeyd edilən ölçünün kub metr olduğunu demir, yəni evin hündürlüyü nəzərə alınmayıb. İstehlakçılar sənədləri nəzərdən keçirən zaman evin həcmini düşünməlidirlər. Çox təəssüflər olsun ki, Azərbaycana gətirilən kondisionerlərin sənədlərində bu məsələ aydın qeyd olunmayıb və bilərəkdən gizlədilir.

Eyni zamanda gətirilən kondisionerlərin 80 faizinin sənədlərində Azərbaycan dilində hər hansı məlumat  əks olunmadığına görə istehlakçı heç nə başa düşmür. Sadəcə, satıcının şirin dilinə inanıb alır və daha sonra kondisionerdə müəyyən problemlər çıxır”.

E.Hüseynovun sözlərinə görə xüsusilə kreditlə alınan kondisionerlər müəyyən problemlərə səbəb olur:

 “Kredit yolu ilə alınan kondisionerlərdə problemlər var. Kondisioner istehlakçının tələbatını ödəmir və onu qaytarmaq istəyir. Lakin kredit ödəmə vaxtı çatanda onu məhkəməyə verirlər və istehlakçı ümumiyyətlə öz hüquqlarını müdafiə edə bilmir.

Digər tərəfdən kondisionerlərin nə dərəcədə soyutması barədə şəffaflıq yoxdur. Bu sahədə böyük qaranlıq var. Azərbaycana gətirilən kondisionerlərin  əksəriyyəti Standartlaşdırma, Metrologiya və Patent üzrə Dövlət Komitəsi tərəfindən yoxlanılmayıb və  heç bir sertfikat verilməyib. Bu cür malları satmaq isə qadağandır”.

Hazırda kondisionerlərin satışı ilə bağlı məlumat almaq üçün  bir neçə mağaza ilə əlaqə yaratdıq.

“Arçelik “ mağazasından verilən məlumata görə, hazırda kondisionerlərə tələbat kifayət qədər artıb:

“Kondisionerlərin qiyməti 499 manatdan başlayıb 3773 manata kimi davam edir. Bunlar kondisionerin ölçülərinə görə dəyişən qiymətlərdir. Ölçü kondisionerlərin eni, uzunluğu və hündürlüyü vurulmasına bərabərdir və otağın həcminə əsasən alınan standart ölçü vahididir. Kondisioner satışı belədir: Müştəri ilkin müraciətini edəndən sonra biz  bəzi parametrləri müəyyənləşdiririk. Məsələn, bir müştəri Qubadan, biri Kürdəmirdən gəlibsə, istədikləri kondisionerlərin forması, kvadrat metri, yaşadığı mənzil və mərtəbəsi eyni olsa da, ölçü vahidlərində fərqlər qoyulur. Yəni əvvəlcə diaqnoz qoyulub, daha sonra təkliflər edilir.

Kondisionerlər alıcıya iki variantda: nağd və kreditlə verilir.  Hazırda kondisionerlərin satışında ciddi artım müşahidə olunur. Müştərilərin əksəriyyəti kreditlə almağa üstünlük verir. Çünki 18 ayadək faizsiz və ilkin ödənişsiz krediti nəzərədə tutan kampaniyamız mövcuddur”.

“Electrolux Baku” mağazası da kondisioner almaq istəyənlərin artdığını bildirib:

“Hazırda kondisioner alanların sayında artım müşahidə edilir. Kondisionerləri şəxsiyyət vəsiqəsi və üç yaxın qohumun əlaqə nömrəsi tələbi ilə verilir.  Eyni zamanda kondisionerlər həm kreditlə, həm də nağdla  alıcılara təklif olunur. Kreditlə ilkin ödəniş 10 faizdir, yerdə qalan məbləği isə 6 aya bölürük. Nağd satış olanda isə həmin mala 10 faiz endirim edirik. Kondisionerlərin qiyməti 555 manatla 1399 manat arasında dəyişir”.

© Modern.az