Nurəddin Saleh oğlu Saruxanov respublikamızda ən uğurlu arıçılardan biridir. Rəhbərlik etdiyi fermer təsərrüfatında hazırda 700-dən artıq arı ailəsi bəslənilir. Etiraf edək ki, bu, kifayət qədər böyük rəqəmdir.  

Nurəddini bu sahədə çalışan başqa fermerlərdən fərqləndirən cəhət onun təkcə kifayət qədər böyük arıçılıq təsərrüfatına sahib olması deyil. O, çox səriştəli seleksionerdir. Nurəddin başçılıq etdiyi təsərrüfatda ən yaxşı ana arıların yetişdirilməsi üçün əlindən gələni edir və bu sahədə həm də müsbət nəticələrə nail olub.

Nurəddin çox çalışır ki, ata-babalarımızın qərinələr, yüzillər boyu becərdikləri yerli şəraitə uyğunlaşdırılmış, xəstəliyə dözümlü arı sortları, xüsusilə, “Boz Qafqaz arı”ları itib-batmasın. Təəssüf ki, belə bir təhlükə var. Belə ki, yerli arı növləri tələf olduğundan ölkəmizə bir çox xarici ölkələrdən arı növləri gətirilib ki, onlar həm məhsuldarlığına, həm də keyfiyyətinə görə bizim arıların yerini verə bilmir.  

Nurəddin bu yaxınlarda qardaş Türkiyənin Muğla bölgəsinin Marmaris şəhərində keçirilən arıçıların beynəlxalq konqresində iştirak edib. Türkiyə arıçılıq sahəsində böyük uğurlar qazanmış ölkədir. Təkcə onu demək kifayətdir ki, bal və bal məhsullarının istehsalı və satışına görə, qardaş ölkə Çindən sonra dünyada ikinci yeri tutur. 

Yeri gəlmişkən, dövlətimizin başçısının 3 oktyabr 2022-ci il tarixli sərəncamı ilə Nurəddin Saruxanov 3-cü dərəcəli “Əmək” ordeni ilə təltif olunub. Qusarlı arıçı cənab Prezidentin onun əməyinə verdiyi yüksək dəyərə görə özünü çox xoşbəxt hesab etdiyini söylədi. 

Arıçı Nurəddinin indi Aliyə və Aişə adlı iki qızı, ulu babasının adını daşıyan Saruxan adlı oğlu var. O, çox ümid edir ki, oğlu bu sənəti davam etdirəcək. Qusar şəhərində bu ailəyə mənsub olan “Arıçı” mağazası fəaliyyət göstərir. Burada həm bal, həm də arıçılıq avadanlıqları satılır. Bu avadanlıqların çoxunu isə atası hazırlayır. 

Yeri gəlmişkən, Saleh kişinin arıçılığın inkişafı ilə bağlı bir çox maraqlı təklifləri var. O çox arzulayır ki, orta məktəblərin biologiya kitablarında arılar və onların növləri haqqında məlumat  verilsin. Başqa bir arzusu isə odur ki, ən azı texnikum və kolleclərdə arıçılıq üzrə mütəxəssislər yetişdirilsin.

Məsaim ABDULLAYEV,

“Xalq qəzeti”