Qlobal səhmlər ABŞ-ın inflyasiya məlumatlarından əvvəl yüksəlməkdə davam edir.

Marja xəbər verir ki, investorlar, ABŞ Mərkəzi Bankının (FED) bəzi rəsmilərinin qarışıq bəyanatlarına və qarşıdan gələn balans açıqlanması mövsümündə məyus olmaları ehtimalına məhəl qoymadan, nikbin gözləntilər ilə ABŞ məlumatlarına fokuslanıblar.

Cümə axşamı ABŞ indeksləri günü 1 faizdən çox artıma bağlayıb. S&P 500 1,28 faiz, Nasdaq 100 isə 1,76 faiz yüksəlib.

Bu həftə qlobal bazarların istiqaməti üçün ən kritik (həlledici) məlumatlar olan ABŞ-ın dekabr ayı istehlak qiymətləri indeksi (inflyasiya göstəricisi) məlumatları Bakı vaxtı ilə saat 17:30-da açıqlanacaqdır.

Bloomberg sorğusunda iştirak edən iqtisadçıların orta gözləntiləri (proqnoz) istehlak qiymətləri indeksində aylıq 0,1 faiz azalma və illik 6,5 faiz artımdır.  Noyabrda ABŞ-da istehlak qiymətləri aylıq 0,1 faiz, illik 7,1 faiz artıb.

Bloomberg Economics-in (BE) ABŞ-ın baş iqtisadçısı Anna Wong dekabr inflyasiya məlumatlarının oktyabr və noyabr aylarında olduğu kimi proqnozlardan aşağı olacağını gözləyir. Wong, "Çindən əmtəə qiymətlərinin düşməsi, tədarüklə bağlı problemlərin azalması və faiz dərəcəsinə həssas sektorlardakı geriləmə inflyasiyanın düşməsinə kömək edir" deyib.

Bloomberg Economics, Fed-in növbəti iki iclasda faizlərini 25 baza bəndi artıraraq 4,75-5 faiz aralığına qaldıracağını və ilin qalan hissəsində onu bu səviyyədə saxlayacağını təxmin edir.

Həmçinin, FED-in Boston şöbəsinin sədri Susan Collins, "New York Times" qəzetinə verdiyi müsahibədə, növbəti Federal Açıq Bazar Komitəsinin iclasında faiz dərəcələrinin 25 baza bəndi artırılmasının tərəfdarı olduğunu deyib.

1,7 trilyon dollarlıq aktivləri idarə edən istiqraz investoru Pacific Investment Management Co. (Pimco), cümə axşamı dərc etdiyi hesabatında, ABŞ-da 2023-cü ildə tənəzzül ehtimalını gördüyünü, istiqrazların səhmlərdən daha cəlbedici bir investisiya olduğunu və ABŞ-ın 10 illik istiqrazlarının gəlirinin 2023-cü ildə 3.25-4.25 faiz aralığında qalacağını gözlədiyini bildirib.