Azərbaycanın “PAŞA Real Estate Qrup” şirkəti Özbəkistanın paytaxtı Daşkənddə yeni premium yaşayış layihəsinin həyata keçirilməsi məqsədilə dünyanın aparıcı mehmanxana operatorlarından biri olan “Marriott International” ilə strateji müqavilə imzalayıb.

Marja.az xəbər verir ki, bu barədə “PAŞA Real Estate Qrup”un yaydığı məlumatda bildirilir.

Müqaviləyə əsasən, Daşkənddə tikintisi davam edən üç binadan ibarət çoxfunksiyalı kompleksdə “JW Marriott Residences Tashkent” brendi altında yeni lüks yaşayış rezidensiyaları yaradılacaq.

Layihə çərçivəsində kompleksin bir binasında “The Ritz-Carlton, Tashkent” oteli və rezidensiyaları, digər iki binasında isə “JW Marriott Residences Tashkent” yerləşəcək. Beləliklə, Azərbaycan şirkətinin Özbəkistanda həyata keçirdiyi layihə çərçivəsində “Marriott International”ın iki beynəlxalq lüks brendi – “The Ritz-Carlton” və “JW Marriott” bir kompleksdə təmsil olunacaq.

Şirkətin məlumatına görə, layihə müasir memarlıq həlləri, yüksək səviyyəli yaşayış infrastrukturu, lüks ticarət və gəzinti zonaları, eləcə də beynəlxalq xidmət standartları ilə fərqlənəcək.

Kompleksin Daşkənddə premium yaşayış və mehmanxana xidmətləri seqmentinin inkişafına töhfə verməsi nəzərdə tutulur.

“PAŞA Real Estate Qrup” açıqlamasında regional fəaliyyətini genişləndirməyə və yeni bazarlarda dəyər yaratmağa davam etdiyini vurğulayıb.

Yeni müqavilə Azərbaycan şirkətinin Özbəkistanın daşınmaz əmlak bazarında fəaliyyətini genişləndirməsi, həmçinin beynəlxalq mehmanxana brendləri ilə əməkdaşlığını gücləndirməsi baxımından əhəmiyyət daşıyır.

Layihəyə yönəldiləcək investisiyanın həcmi, yaşayış sahələrinin sayı, satış qiymətləri və kompleksin istifadəyə veriləcəyi tarix açıqlanmayıb.

Özbəkistanın İnvestisiyalar, Sənaye və Ticarət Nazirliyinin 27 may 2025-ci il tarixli açıqlamasına əsasən, Daşkənddə “The Ritz-Carlton” brendi altında beşulduzlu hotel və yaşayış kompleksinin yaradılması layihəsinin dəyəri 200 milyon ABŞ dolları təşkil edir. Tikinti işlərinə 2024-cü ilin avqustunda başlanılıb. Bununla belə, yeni “JW Marriott Residences Tashkent” müqaviləsinin həmin investisiya məbləğini dəyişib-dəyişmədiyi açıqlanmayıb.