Azərbaycan Mərkəzi Bankı (AMB) ölkədə fəaliyyət göstərən “Bank Melli İran”ın Bakı filialına qarşı yeni məhdudiyyətlərin tətbiqini planlaşdırmır.

Marja.az xəbər verir ki, bunu Azərbaycan Mərkəzi Bankının İdarə Heyətinin sədri Taleh Kazımov oktyabrın 29-da keçirilən mətbuat konfransında jurnalistlərin suallarını cavablandırarkən bildirib.

Onun sözlərinə görə, uzun illərdir beynəlxalq sanksiyalar şəraitində fəaliyyət göstərən bank Azərbaycan bank sektorunda çox kiçik paya malikdir.

“Bank Melli İran”ın bazar payı müxtəlif göstəricilər üzrə təxminən 0,1 faiz təşkil edir. Bank artıq illərdir sanksiyalar altındadır və Azərbaycanda fəaliyyətini davam etdirir. Hər hansı yeni məhdudiyyət tətbiq etməyi planlaşdırmırıq”, – deyə Taleh Kazımov bildirib.

Mərkəzi Bankın sədri vurğulayıb ki, İran bankı Azərbaycan qanunvericiliyinin və tənzimləyici qurumun müəyyən etdiyi tələblərin icrasını təmin edir.

Onun sözlərinə görə, bankın fəaliyyəti Mərkəzi Bankın nəzarətindədir və hazırda əlavə inzibati tədbirlərə ehtiyac görülmür.

“Bank Mərkəzi Bankın tələblərinə, həmçinin ölkə qanunvericiliyinə riayət edir. Hazırda hər hansı tədbir görülməsini nəzərdə tutmuruq”, – deyə AMB sədri qeyd edib.

Taleh Kazımov xarici ölkələrdə, o cümlədən ABŞ-də İran banklarının fəaliyyəti və filial şəbəkəsi ilə bağlı müzakirələrə də münasibət bildirib.

O qeyd edib ki, həmin müzakirələrdən xəbərdardır, lakin bu, Azərbaycanda bankın fəaliyyətinə qarşı əlavə tədbirlərin görülməsini zəruri etmir.

AMB sədrinin sözlərinə görə, “Bank Melli İran”ın fəaliyyəti digər banklar kimi nəzarətdə saxlanılır və onunla bağlı risklərə xüsusi diqqət yetirilir.

Taleh Kazımov bildirib ki, bank uzun müddətdir Azərbaycan maliyyə bazarında fəaliyyət göstərdiyindən yerli bazarın xüsusiyyətlərini və tənzimləmə tələblərini yaxşı bilir.

“Bu bank artıq uzun müddətdir Azərbaycan bazarında fəaliyyət göstərir və reallıqları başa düşür. Biz burada hər hansı problem və ya çətinlik görmürük”, – deyə Mərkəzi Bankın sədri vurğulayıb.